2026 جىلى قىرعىز رەسپۋبليكاسىندا وتەتىن VI دۇنيەجۇزىلىك كوشپەندىلەر ويىندارىنىڭ باعدارلاماسىنا قازاقتىڭ ۇلتتىق ويىنى – كوكپار ەنبەي قالدى، دەپ حابارلايدى "ادىرنا" ۇلتتىق پورتالى.
بۇل تۋرالى قىرعىزستاننىڭ دەنە شىنىقتىرۋ جانە سپورت مەملەكەتتىك اگەنتتىگىنىڭ ديرەكتورى ايبەك ءابدىمومىنوۆ مالىمدەدى.
ونىڭ ايتۋىنشا، الداعى ويىنداردا كوكبورىدەن تۋرنير ۇيىمداستىرىلادى. جارىس كلۋبتىق فورماتتا وتەدى – ءار كوماندا ءارتۇرلى ەلدەردەن جينالعان ويىنشىلاردان قۇرالادى.
"كلۋبتار جەرەبە ارقىلى جاساقتالادى. مىسالى، ءبىر كوماندادا قىرعىزستان، قازاقستان، وزبەكستان جانە ۆەنگريادان كەلگەن ويىنشىلار ويناۋى مۇمكىن", – دەپ ءتۇسىندىردى ءابدىمومىنوۆ.
مەملەكەتتىك اگەنتتىك باسشىسى بۇل جاڭا فورمات سپورتتىڭ ساياسيلانۋىنا جول بەرمەي، كەرىسىنشە، ۇجىمدىق جۇمىس پەن دوستىقتى نىعايتادى دەپ ەسەپتەيدى. ونىڭ ايتۋىنشا، اتالعان شەشىم قىرعىزستاننىڭ كوكبورى فەدەراتسياسىمەن بىرلەسە وتىرىپ قابىلدانعان.
ء"بىز بىرنەشە رەت كەزدەسۋ وتكىزىپ، جارىس ەرەجەلەرىن ەگجەي-تەگجەيلى تالقىلادىق. اسىرەسە قاۋىپسىزدىك ماسەلەلەرى مەن قورعانىس جابدىقتارىنىڭ ساپاسىنا باسا ءمان بەرىلدى. جاقىن ارادا جاڭارتىلعان ەرەجە جاريالانادى", – دەدى ءابدىمومىنوۆ.
ايتا كەتەيىك، استانادا وتكەن V دۇنيەجۇزىلىك كوشپەندىلەر ويىندارىنىڭ باعدارلاماسىنا كوكپار مەن كوكبورى دە ەنگىزىلگەن ەدى. كوكپاردان وتكەن تۋرنيردە قازاقستان قۇراماسى چەمپيون اتانىپ، ەكىنشى ورىندى يەلەنگەن قىرعىزستان كومانداسى ماراپاتتاۋ ءراسىمىن اياقتاماي جاتىپ، مەدالدارىن شەشىپ تاستاپ، زالدان شىعىپ كەتكەنى قوعامدا رەزونانس تۋدىرعان.
