دەپۋتات نارتاي ارالبايۇلى بيلىككە سىرتتان اكەلىنەتىن كولىك قۇرالدارىنا سالىناتىن كەدەندىك باج سالىقتارىنا قاتىستى دەپۋتاتتىق ساۋال جولدادى، دەپ حابارلايدى "ادىرنا" ءتىلشىسى.
ءماجىلىس دەپۋتاتى نارتاي سارسەنعاليەۆ ەسكى اۆتوكولىكتەر ماسەلەسىن كوتەرىپ، شەتەلدىك كولىكتى ەلگە كىرگىزۋ ءۇشىن تولەنەتىن تولەمدەردىڭ قالتا كوتەرمەيتىندىگىنە نازار اۋداردى.
ءماجىلىس وتىرىسىندا ماسەلەنى بايانداعان دەپۋتات قازاقستاندىقتار كولىكتى قىرعىزستان ارقىلى ەكى ەسە ارزانعا كىرگىزىپ جۇرگەنىن، سالدارىنان ەل بيۋدجەتى قىرۋار اقشادان قاعىلىپ وتىرعانىن ايتتى.
دەپۋتات سانداردى سويلەىپ، ارنايى ستاتيستيكا بيۋروسىنىڭ مالىمەتىن دە جايىپ سالدى. ونىڭ سوزىنشە، قازاقستاندا 4 ميلليون جەڭىل اۆتوكولىك، 454 مىڭ جۇك كولىگى مەن 95 مىڭ اۆتوبۋس بار. تەمىر تۇلپاردىڭ تالقانى شىقپاي ءجۇرىپ بەرەتىن ۋاقىتى — 10 جىلدى قۇرايدى. ال قازاقستاندا تىركەلگەن جەڭىل اۆتوكولىكتەردىڭ 49% زاۋىتتان شىققانىنا 20 جىلدان اسقان، 21% 10 جىل تولعان.
"قازاقتا: "شاباتىن كولىك كۇي تىلەيدى" دەيتىن بار. بىراق 4 ميلليون جەڭىل اۆتوكولىكتىڭ تەڭ جارتىسىنىڭ تاس جولعا تابانى تيگەنىنە 20 جىل تولعان بولسا ودان قانداي كۇي سۇرايمىز؟ ءۇيسىز، كۇيسىز جۇرگەن ازاماتتارىمىزدىڭ ەڭ بولماعاندا دۇرىس كولىك مىنگىسى-اق كەلەدى. بىراق وعان اقىلعا سىيمايتىن كەدەرگىلەر قويىلعان. ءارى قاراي، كولىكتىڭ شىعارىلعان جىلىنا قاراي تولەم بار. پەرۆيچكا دەيدى. ەگەر قازاقستانعا اكەلىنگەن كولىكتىڭ شىعارىلعانىنا 3 جىلدان اسسا تاعى 1,8 ميلليون تەڭگە تولەۋ كەرەك. وعان سۆح مەن پورتتىڭ جانە بروكەرلەردىڭ اقشاسىن قوسىڭىز. وسىنشا مىندەتتى تولەمنىڭ سالدارىنان شەتەلدەگى ساپالى اۆتوكولىكتى قازاقستان ازاماتتارى اكەلىپ مىنە المايدى.
ازاماتتارىمىز مىندەتتەمەلەردى تولەمەيمىز دەپ وتىرعان جوق، بىراق باستى پروبلەما كەدەندىك سەتكا", - دەپ دەپۋتات جۇرگىزۋشىلەردىڭ باستى ماسەلەسىن بيلىككە جەتكىزدى.
دەپۋتاتتىڭ مالىمەتىنشە كولىك العاندار تاۋسىلمايتىن تولەمنەن ارىلۋ ءۇشىن كورشىلەس قىرعىزستانعا تىركەلەدى.
"ەڭ سوراقىسى، تاۋسىلمايتىن تولەمنەن ارىلۋ ءۇشىن شەتەلدەن العان اۆتوكولىكتەرىن الدىمەن قىرعىزستانعا اكەلىپ تىركەيدى. ول جاقتاعى تولەم بىزدەن 2 ەسە از ەكەن. سوسىن قازاقستانعا كىرگىزەدى. وسىلايشا ءبىز ءوز قولىمىزبەن وزگە ەلدىڭ بيۋدجەتىنە قارجى قۇيىپ وتىرمىز. 2023 جىلدىڭ قاڭتارى مەن ءساۋىرى ارالىعىندا قىرعىز ەلىنە 41 مىڭ اۆتوكولىك كىرگەن. كەيىن سونىڭ ءبىراز بولىگى ءبىزدىڭ ەلگە وتكەن دەلىنەدى اشىق دەرەكوزدە. وسىلايشا قازاقستان ازاماتتارىن جاقسى كولىك ءمىنۋ قۇقىعىنان قاعىپ جانە قازىناعا ءتۇسۋى ءتيىس قىرۋار قاراجاتتان دا قاعىلىپ وتىر", - دەپ ءتۇسىندىردى نارتاي ارالباي.
