قازاقستاننىڭ بۇرىنعى باسشىسى نۇرسۇلتان نازارباەۆ الەمدەگى باي باسشىلاردىڭ تىزىمىندە بار، دەپ حابارلايدى "ادىرنا" ۇلتتىق پورتالى.
شەتەلدىك باق The New York Times, Forbes دەرەككوزدەرىنە سۇيەنە وتىرىپ جاسالعان ساراپتاما الەمدەگى ەڭ باي پرەزيدەنتتەر مەن پرەمەر-مينيسترلەردىڭ ءتىزىمىن ۇسىندى.
ءتىزىمنىڭ توعىزىنشى قاتارىندا قازاقستاننىڭ ەكس-پرەزيدەنتى نۇرسۇلتان نازارباەۆ بار.
قازاقستاننىڭ تۇڭعىش پرەزيدەنتىنىڭ بايلىعى 1–2 ميلليارد دوللار كولەمىندە دەپ باعالانادى. اقپاراتتا بايلىقتىڭ كاپيتال ەنەرگەتيكا، بانك ءىسى جانە جىلجىمايتىن مۇلىك ارقىلى جينالعانى كورسەتىلگەن.
كوشتى رەسەي فەدەراتسياسىنىڭ پرەزيدەنتى ۆلاديمير پۋتين باستاپ تۇر. ساراپشىلار ونىڭ جەكە كاپيتالى 200 ميلليارد دوللارعا دەيىن جەتۋى مۇمكىن دەپ بولجاعان.
ەكىنشى ورىندا برۋنەي سۇلتانى ءارى پرەمەر-ءمينيسترى حاسسانال بولكياح تۇر. ول 50 ميلليارد دوللارلىق مۇناي-گاز بايلىعىمەن الەمدەگى ەڭ اۋقاتتى باسشىلاردىڭ قاتارىندا بار. ونىڭ يەلىگىندە التىنمەن قاپتالعان ۇشاقتار، 7 مىڭنان استام ليۋكس كولىك جانە 1 800 بولمەلى سارايى انىقتالعان.
دۋباي بيلەۋشىسى جانە ءباا پرەمەر-ءمينيسترى مۇحاممەد بين راشيد ءال-ماكتۋم ءۇشىنشى ورىندا تۇر. ول 20 ميلليارد دوللار كولەمىندەگى بايلىعىمەن بەلگىلى.
اق ۇيگە ميللياردەر رەتىندە كەلگەن اقش-تىڭ 45-ءشى جانە 47-ءشى پرەزيدەنتى دونالد ترامپتىڭ بايلىعى 5,1 ميلليارد دوللار شاماسىندا. ول وسى بايلىقپەن بەسىنشى ورىنعا جايعاسقان.
قازاقستاننىڭ ەكس-پرەزيدەنتى نۇرسۇلتان نازارباەۆ 2019 جىلى بيلىكتەن كەتكەنىمەن، 2022 جىلدىڭ قاڭتارىنا دەيىن قاۋىپسىزدىك كەڭەسىنىڭ توراعاسى رەتىندە ىقپالعا يە بولدى. 2022 جىلى قاڭتار وقيعاسى كەزىندە وسى قىزمەتىنەن ءبىر تۇندە جۇرداي بولعان نازارباەۆ ءوزىن "قاراپايىم زەينەتكەر" اتاعان ەدى.
