اقىن ءارى ديسسيدەنت ارون اتابەكتىڭ ولەڭدەر جيناعى كىتاپ بولىپ شىقتى. 10 قازان كۇنى الماتىدا كىتاپتىڭ پرەزەنتاتسياسى ءوتتى.
شارا ۇيىمداستىرۋشىلارىنىڭ ايتۋىنشا، اتالمىش كىتاپ ،ياعني ارون اتابەكتىڭ ولەڭ جيناقتارى "ناعىز اتاجۇرت" ۇيىمىنىڭ قولداۋشىسى ءارى وكىلى تۇراربەك قۇسايىنوۆتىڭ دەمەۋشىلىگىمەن 500 دانا بولىپ باسىلعان.كىتاپتى قۇراستىرعانداردىڭ ءبىرى – ساياساتكەر جاسارال قۋانىشالى. وعان ارون اتابەكتىڭ سايتىنداعى كەيبىر ولەڭدەرى كىرگەن.
كىتاپ جەكە قارجىعا تۇسكەن. ساتۋدان تۇسكەن اقشا ارون اتابەكتى قولداۋ رەتىندە قارىنداسىنىڭ ەسەپ-شوتىنا اۋدارىلادى دەدى كىتاپتى تانىستىرعاندار.
2006 جىلعى شاڭىراق وقيعاسىنان كەيىن 18 جىلعا سوتتالعان ارون اتابەك 15 جىل تۇرمە جازاسىنان كەيىن 1 قازان كۇنى دەنساۋلىق جاعدايىنا بايلانىستى بوستاندىققا شىقتى. اقىننىڭ ءحالى ناشار ەكەنىن وسىعان دەيىن قۇقىق قورعاۋشى ەلەنا سەمەنوۆا مەن ۇلتتىق الدىن الۋ تەتىگى حابارلاعان. بىراق اتابەكتىڭ ءوزى اۋرۋحاناعا جاتۋدان باس تارتىپ كەلگەن.
حالىقارالىق قۇقىق قورعاۋ ۇيىمدارى سوۆەت ديسسيدەنتى ارون اتابەكتى "ساياسي تۇتقىن" سانايدى. بيىل اقپاندا ەۋروپارلامەنت قازاقستانداعى ادام قۇقىعى احۋالى جايلى قابىلداعان قارارىندا
نۇر-سۇلتاندى ەلدە تۇرمەدە وتىرعان ساياسي تۇتقىنداردى بوساتۋعا ۇندەگەن. ەۋروپارلامەنت دەپۋتاتتارى ولاردىڭ اراسىندا ارون اتابەكتى دە اتاعان.
اقىننىڭ ءوزى بەرىلگەن مەرزىمدى تولىق وتەۋگە بەكىنىپ، مەرزىمىنەن بۇرىن بوساتۋ تۋرالى ءوتىنىش جازۋدان باس تارتقان.
اقىن بوستاندىققا شىققان سوڭ ازاتتىققا سۇحبات بەرىپ، 21 قىركۇيەكتە وقىس قۇلاپ، باسىن جارعانىن، سودان كەيىن اۋرۋحاناعا بارۋعا ءماجبۇر بولعانىن ايتقان. ايتۋىنشا، بيلىك اقىننىڭ وزىنە بىلدىرتپەي سول اۋرۋحانادان تىكەلەي اۋەجايعا اپارىپ، الماتىعا شىعارىپ سالعان.
بوستاندىققا شىققاننان كەيىن تۋىستارى ارون اتابەكتىڭ ءحالى ناشارلاپ اۋرۋحاناعا جەتكىزىلگەنىن، بىراق ونىڭ اۋرۋحاناعا جاتۋدان باس تارتقانىن حابارلاعان.
قازىر ول ۇيدە ەمدەلىپ جاتىر. ساناۋلى كۇن بۇرىن سەرىگى مۇرات ەسەنعازى ارون اتابەكتىڭ وكپەسى 38 پايىزعا قابىنعانىن ايتتى.
"ادىرنا" ۇلتتىق پورتالى
