گەرمانيادا ءوتىپ جاتقان XXXII جازعى دۇنيەجۇزىلىك ۋنيۆەرسيادادا قازاقستان قۇراماسى العاشقى التىن مەدالگە قول جەتكىزدى، دەپ حابارلايدى “ادىرنا” ۇلتتىق پورتالى.
التىن مەدالدى تاەكۆوندوشى ساميرحون اباباكيروۆ جەڭىپ الدى.
63 كەلىگە دەيىنگى سالماق دارەجەسىندە ونەر كورسەتكەن سپورتشى فينالدا تۇركيالىق ومەر فارۋك دايىوگلۋمەن كەزدەسىپ، ەكى راۋندتا دا باسىم ءتۇسىپ (12:11, 11:3), 2:0 ەسەبىمەن جەڭىسكە جەتتى. وسىلايشا اباباكيروۆ جارىستىڭ التىن جۇلدەگەرى اتاندى.
بۇل — قازاقستاننىڭ ۋنيۆەرسيادا-2025 اياسىندا تاەكۆوندودان جەڭىپ العان التىنشى جۇلدەسى. بۇعان دەيىن دامير شۋلەنوۆ، تاميرلان تىلەۋلەس، باتىرحان تولەۋعالي، بەيبارىس قابلان جانە نوديرا احمەدوۆا قولا مەدال يەلەنگەن بولاتىن.
ساميرحون اباباكيروۆ تۋرنير بارىسىندا بەس كەزدەسۋ وتكىزىپ، بارلىعىندا دا جەڭىسكە جەتتى.
جازعى ۋنيۆەرسياداعا ەلىمىزدىڭ اتىنان 76 سپورتشى 12 سپورت ءتۇرى بويىنشا قاتىسۋدا. ۋنيۆەرسيادا گەرمانيانىڭ رەين-رۋر وڭىرىندە 16–27 شىلدە ارالىعىندا وتەدى.
