قاراعاندى وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى ادام ساۋداسىنىڭ قۇرباندارىنا الەۋمەتتىك كومەك كورسەتۋ ءۇشىن 5 769 000 تەڭگە قارجى ءبولىندى، دەپ حابارلايدى “ادىرنا” ۇلتتىق پورتالى satypalu.gov.kz سايتىنا سىلتەمە جاساپ.
اتالعان مەملەكەتتىك ساتىپ الۋ 31 شىلدە كۇنى "ادام ساتۋ قۇرباندارىنا ارناۋلى الەۋمەتتىك قىزمەت كورسەتۋ" دەگەن تاقىرىپپەن جاريالانعان. 5 769 000 تەڭگەگە باعالانعان تەندەر جەڭىمپازى 10 تامىز كۇنى انىقتالادى. تەحنيكالىق سيپاتتامادا تاپسىرىس ورىنداۋشى ادام ساۋداسىنىڭ قۇرباندارىنا ارناۋلى الەۋمەتتىك قىزمەتتەردى ۇسىناتىنى جازىلعان. "جوبانى جۇزەگە اسىرۋ ورنى قاراعاندى قالاسى، ىسكە اسىرۋ مەرزىمى 2023 جىلدىڭ اقپان-جەلتوقسان ايلارى ەكەنى" كورسەتىلگەن.
قاراڭىز ء(ماتىن قاز-قالپىندا بەرىلدى): "قىزمەت الۋشىلاردىڭ سانى 2023 جىلى – 7 ادام. قارجىلاندىرۋ سوماسى شارت جاسالعان كۇننەن باستاپ 2023 جىلعى قارجى جىلىنىڭ 274 كۇنىنە (9 ايىنا) ەسەپتەلگەن. قاجەت بولعان كەزدە قارجى جىلىنىڭ قالعان كۇندەرىن الەۋەتتى ءونىم بەرۋشى ارناۋلى الەۋمەتتىك قىزمەتتەردى ءوز قاراجاتى ەسەبىنەن ۇسىنادى".
بۇل ورايدا وزدىگىنەن "قاراعاندى وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى جىلدان شاتاسىپ وتىر ما؟" دەگەن زاڭدى سۇراق تۋىندايدى. ايتپەسە، وتكەن2023 جىلعى شارالارعا بيىل اقشا ءبولۋى زاڭعا قايشى ەمەس پە؟ ءبىزدىڭ ويىمىزشا, باسقارما 2023جىلى جازىلعان تەحنيكالىق سيپاتتامانى 2024 جىلى وزگەرتپەستەن كوشىرە سالعان. سونىڭ وزىندە باسقارما بيىلعى جىلدىڭ قاڭتار-جەلتوقسان ايلارىنىڭ اراسىندا اتقارىلۋى ءتيىس جۇمىستارعا شىلدەنىڭ اياعىندا ءبىر-اق تەندەر جاريالاپ وتىر دەگەن ءسوز.
تاپسىرىس ورىنداۋشى الداعى ءتورت ايدا قۇجاتتاردا تايعا تاڭبا باسقانداي كورسەتىلگەن 274 كۇندىك، ياعني 9 ايلىق جۇمىستى قالاي جاسايدى؟ مىسالى، تەحنيكالىق سيپاتتامادا تاپسىرىس ورىنداۋشى ادام ساۋداسىنىڭ قۇرباندارىنا 6 ايعا دەيىن ۋاقىتشا تۇرۋعا باسپانا تاۋىپ بەرۋى كەرەكتىگى جازىلعان. جەلتوقسان ايىنا دەيىن بار بولعانى 4 ايعانا مەرزىم قالدى. ال، قۇجاتتا باسقارما قايداعى 274 كۇندى ايتىپ وتىر؟ بۇل - ءبىر.
ەكىنشىدەن، قاراعاندىدا 2023 جىلى ادام ساۋداسىنىڭ قۇربانى بولعان 7 ادام بولعان ەكەن. بيىل قانشا ادام بار؟ تەندەر جەڭىمپازى ناقتى قانشا ازاماتقا الەۋمەتتىك، رۋحاني، پسيحولوگيالىق جاردەم كورسەتەتىنى انىق جازىلماعان. جوق الدە، بىلتىرعى 7 ادام بيىل دا كومەككە ءماجبۇر مە؟
ۇشىنشىدەن، جىل بويى اتقارىلۋى كەرەك جوباعا نە سەبەپتى سوڭعى ءتورت اي قالعاندا تەندەر جاريالانادى؟ تەندەردى ۇتىپ العان كومپانيا 274 كۇننىڭ ەسەبىن قالاي تاپسىرماق؟
بۇل سۇراقتاردى اتالمىش باسقارماعا جولدادىق. ولاردان جەتكەن جاۋاپتى دا جاريالايتىن بولامىز!
اقان اسىل
“ادىرنا” ۇلتتىق پورتالى
