قاراعاندى وبلىسىنىڭ اۋىلدىق مەكتەپتەرىندە ەرەكشە قاجەتتىلىكتەرى بار بالالاردىڭ وقىپ، دامۋىنا جاعداي جاسالۋدا. نۇرا اۋدانىنداعى ىبىراي التىنسارين اتىنداعى تىرەك مەكتەبىندە ينكليۋزيۆتى ءبىلىم بەرۋ كابينەتى جاڭعىرتۋدان ءوتتى. ەندى مۇندا زاماناۋي جابدىقتار، ارنايى ايماقتار جانە ەرەكشە ءبىلىم الۋدى قاجەت ەتەتىن بالالاردىڭ الەۋەتىن اشۋعا كومەكتەسەتىن كاسىبي ماماندار توبى بار.
كابينەت مەكتەپتە بىرنەشە جىلدان بەرى جۇمىس ىستەپ كەلەدى. وندا بىلىكتى ماماندار قىزمەت اتقارادى: ەكى پسيحولوگ، لوگوپەد، دەفەكتولوگ، الەۋمەتتىك پەداگوگ جانە پەداگوگ-اسسيستەنت. ولار تۇزەتۋ جانە دامىتۋ ساباقتارىن جۇرگىزىپ، بالالاردىڭ الەۋمەتتەنۋىنە كومەكتەسەدى. قازىر مەكتەپتە 526 وقۋشى وقيدى، ولاردىڭ 13-ءى پمپك قورىتىندىسى بويىنشا بەيىمدەلگەن باعدارلامالاردى مەڭگەرۋدە. جاڭعىرتىلعان كابينەت ولار ءۇشىن وقۋ مەن قارىم-قاتىناستا باستى تىرەك بولادى.
جوندەۋدەن كەيىن كابينەت ءتورت ايماققا ءبولىندى: جەكە جانە توپتىق ساباقتارعا ارنالعان بولمە، رەلاكساتسياعا ارنالعان سەنسورلىق ايماق، موتوريكانى دامىتۋعا باعىتتالعان ديداكتيكالىق مودۋلدەر جانە قۇمدى جارىق ۇستەلى مەن تاكتيلدى ۇياشىقتارى بار ايماق. الەۋمەتتىك پەداگوگقا ارنالعان جۇمىس ورنى دا جەكە جابدىقتالدى: مۇندا زاماناۋي مونوبلوك، پرينتەر جانە ادىستەمەلىك ماتەريالدار بار.
— ينكليۋزيۆتى ءبىلىم بەرۋ كەڭىستىگىن قۇرۋ جانە دامىتۋ — بۇل ءار بالانىڭ جەكە ەرەكشەلىكتەرىنە قاراماستان ءوزىن قابىلدانعان، تۇسىنىلگەن جانە قاجەت سەزىنەتىن بولاشاعىنا قوسقان ۇلەس، — دەيدى مەكتەپ ديرەكتورى تاتيانا يۋنگەنشتەين. — مەملەكەت پەن ءبىلىم بەرۋ ۇيىمدارىنىڭ قولداۋى ءبىلىمدى بارشاعا قولجەتىمدى ەتۋگە مۇمكىندىك بەرەدى.
مەكتەپتەگى ينكليۋزيۆتى ورتانىڭ دامۋى «قازاقستان حالقىنا» قورىنىڭ اۋىلدىق جەرلەردەگى تىرەك مەكتەپتەردى دامىتۋ جوباسى اياسىندا جۇزەگە استى.
باعدارلاما شەڭبەرىندە ءبىلىم ورداسى 250 ميلليون تەڭگەگە زاماناۋي جابدىقپەن قامتاماسىز ەتىلدى. ينكليۋزيا كابينەتىنە قوسا، مەكتەپتە STEM-زەرتحانا، روبوتوتەحنيكا، فيزيكا جانە حيميا كابينەتتەرى جاڭا زەرتحانالارىمەن اشىلدى، اكت جانە سپورت زالدارى مەن مەكتەپكە دەيىنگى دايارلىق كابينەتتەرى جاڭارتىلدى.
مەكتەپ سونىمەن قاتار نۇرا اۋدانىنداعى باسقا دا ءبىلىم بەرۋ ۇيىمدارى ءۇشىن رەسۋرستىق ورتالىق قىزمەتىن اتقارادى: مۇنداعى ماماندار ەرەكشە ءبىلىم الۋدى قاجەت ەتەتىن بالالار مەن ولاردىڭ اتا-انالارىنا كەڭەس بەرەدى، ادىستەمەلىك ازىرلەمەلەرمەن بولىسەدى.
مۇعالىمدەر ينكليۋزيۆتى ءبىلىم بەرۋ بويىنشا بىلىكتىلىگىن ارتتىرىپ، ەرەكشە بالالارمەن جۇمىس ىستەۋدىڭ زاماناۋي ادىستەرىن ەنگىزۋدە. بۇل قالا مەن اۋىل مەكتەپتەرى اراسىنداعى الشاقتىقتى ازايتۋعا مۇمكىندىك بەرەدى.
بۇرقاسىن بوران. قاراعاندى وبلىسى تۇرعىندارىنا ەلدى مەكەندەردەن تىس جەرلەرگە شىقپاۋعا كەڭەس بەرىلدى
