13 ءساۋىر كۇنى كەشكى ساعات 22:45 شاماسىندا قاراعاندى وبلىسى، تەمىرتاۋ قالاسىنداعى جەدەل مەديتسينالىق جاردەم ستانتسياسىنىڭ اۋماعىندا اۋىر وقيعا ورىن الدى. كەزەكشىلىك كەزىندە فەلدشەر ايەل ءوز ارىپتەسىنىڭ قاتىگەز شابۋىلىنا تاپ بولدى، دەپ حابارلايدى "ادىرنا" ۇلتتىق پورتالى.
رەسمي دەرەكتەرگە سايكەس، 1995 جىلى تۋعان فەلدشەر قىز كەزەكشىلىك كەزىندە تەلەفونمەن سويلەسىپ تۇرعان ساتىندە، الكوگولدىك ماس كۇيدە بولعان ارىپتەسى – 1994 جىلى تۋعان فەلدشەر ا. وعان جاقىنداپ، "سويلەسەيىك" دەگەن جەلەۋمەن كەنەتتەن تاماعىنان قىسىپ، جەرگە قۇلاتىپ، ۇرىپ-سوعۋعا كىرىسكەن.
كۋاگەرلەردىڭ ايتۋىنشا، ەر ادام جابىرلەنۋشىنى بەتتەن ۇرىپ، شاشىنان تارتىپ، ونى جەرگە سۇيرەگەن. وقيعا كۋاگەرى بولعان ارىپتەستەرى زورلىقشىنى توقتاتىپ، ايەلدى قۇتقارىپ قالعان. الايدا كۇدىكتى بىردەن وقيعا ورنىنان قاشىپ كەتكەن.
جابىرلەنۋشى – تەمىرتاۋ قالاسىنىڭ 30 جاستاعى تۇرعىنى. ول اۋىر سوققىلار العان. قازىر ونىڭ جاعدايى دارىگەرلەردىڭ باقىلاۋىندا. پوليتسيا قىزمەتكەرلەرى كۇدىكتىنى ءىزىن سۋىتپاي ۇستاپ، پوليتسيا بولىمشەسىنە جەتكىزدى.
الدىن الا تەرگەۋ ناتيجەسى بويىنشا، وقيعا قىزمەتتىك مىندەتتەرگە بايلانىستى ەمەس، جەكە كەلىسپەۋشىلىكتەن تۋىنداعان. اتالعان فاكتىگە بايلانىستى قازاقستان رەسپۋبليكاسىنىڭ قىلمىستىق كودەكسى اياسىندا قىلمىستىق ءىس قوزعالدى. قازىرگى ۋاقىتتا تەرگەۋ امالدارى جالعاسۋدا.
تەمىرتاۋ پوليتسياسى وقيعانىڭ بارلىق ءمان-جايىن انىقتاۋ ءۇشىن سوتقا دەيىنگى تەرگەۋ جۇرگىزىپ جاتقانىن مالىمدەدى.
