قازاقستاننىڭ بىرىككەن اراب امىرلىكتەرىندەگى ەلشىسىنىڭ كەڭەسشىسى بولعان ساكەن ماماشقا قاتىستى سوت پروتسەسىنىڭ شەشىمى بەلگىلى بولدى. ول قىلمىستىق كودەكستىڭ 110-بابى (ازاپتاۋ) بويىنشا ايىپتالىپ، 6 جىلعا سوتتالدى، دەپ حابارلايدى “ادىرنا”.
سوت وسىعان دەيىن كارينا ماماشتىڭ ءوتىنىشى نەگىزىندە جابىق فورماتتا وتكەن ەدى. الايدا سوڭعى شەشىم باق-قا اشىق فورماتتا ءوتتى.
سۋديا ساكەن ماماشتى كىنالى دەپ تانىپ، 6 جىلعا باس بوستاندىعىنان ايىرۋ جايلى شەشىم قابىلدادى.
«قىلمىستىق ءىس جۇرگىزۋ كودەكسىنىڭ 387–390, 393, 395–398, 401–402-باپتارىن باسشىلىققا الا وتىرىپ، سوت ماماش ساكەن تاشكەنبايۇلىن قر قىلمىستىق كودەكسىنىڭ 110-بابى 2-بولىگى 1-تارماعىندا كوزدەلگەن قىلمىستى جاساعانى ءۇشىن كىنالى دەپ تانىپ، وعان ورتاشا قاۋىپسىزدىك مەكەمەسىندە 6 جىل باس بوستاندىعىنان ايىرۋ جازاسىن تاعايىندادى»،– دەپ ۇكىمدى جاريا ەتتى سۋديا ارتۋر ابدىقانوۆ.
ساكەن ماماش 2014 جىلدان باستاپ جابىرلەنۋشى كارينامەن زاڭدى نەكەدە تۇرعان. نەكە كەزەڭىندە جابىرلەنۋشى ەكى بالا دۇنيەگە اكەلىپ، ءۇي شارۋاسىنداعى ايەل بولعان. ول ديپلوماتتىڭ جۇبايى رەتىندە جاردەماقى العان، الايدا، بۇل قاراجاتتى ماماش ءوزى الىپ وتىرعان. ءۇي شارۋاسىنا بايلانىستى بارلىق شىعىنداردى ساكەن ماماش قارجىلاندىرعان.
سوتتالۋشى ماماشتىڭ جابىرلەنۋشىگە تۋىستارى مەن قۇربىلارىمەن ارالاسۋعا تىيىم سالعان، ونىڭ قوڭىراۋلارى مەن حات-حابارلارىن، ءجۇرىس-تۇرىسىن باقىلاپ وتىرعانى ايتىلادى.
ديپلوماتتىڭ 2019–2024 جىلدار ارالىعىندا، استانادا جانە كەيىننەن ءباا، ابۋ-دابيدە جۇرگەن كەزىندە جۇيەلى تۇردە كۇش قولدانعانى ياعني جۇدىرىقپەن جابىرلەنۋشى دەنەسىنىڭ ءتۇرلى جەرلەرىنە جانە باسىنا دەنە جاراقاتتارىن سالعانى تۋرالى دا تىركەلگەن.
سوتتالۋشىنىڭ كىناسى جابىرلەنۋشىنىڭ، كۋالاردىڭ ايعاقتارىمەن، ساراپتامالىق قورىتىندىلارمەن، بەينەجازبالارمەن، سكرينشوتتارمەن جانە وزگە دە ءىستىڭ ماتەريالدارىمەن دالەلدەندى دەلىنەدى.
ەسكە سالساق، كارينا ماماشتىڭ 10 جىل بويى كۇيەۋى ۇرىپ-سوعىپ كەلگەن مالىمدەمەسىنەن كەيىن ساكەن ماماش دۋبايداعى قىزمەتىنەن ەلگە قايتارىلعان ەدى. ەلشى كەڭەسشىسىنىڭ ۇستىنەن «ازاپتاۋ» بابى بويىنشا ءىس قوزعالعان بولاتىن.
