29 قاراشادا استانانىڭ اۋداندىق سوتى بەلگىلى مارافونشى مارات جىلانباەۆتى 7 جىلعا سوتتادى، دەپ حابارلايدى «ادىرنا» ۇلتتىق پورتالى.
مارات جىلانباەۆتىڭ ادۆوكاتى مەيىرجان دوسقاراەۆ Ulysmedia تىلشىسىنە بەرگەن اقپاراتىندا بەلسەندىگە ۇكىم قازىر 16.55 ۋاقىتىندا زۋم ارقىلى شىعاتىنىن حابارلادى
بۇعان دەيىن پروكۋرور سوتتان مارات جىلانباەۆتى 10 جىلعا تۇرمەگە قاماۋدى سۇراعان بولاتىن.
«17 قاراشادا استانادا بەلگىلى مارافونشى، «العا، قازاقستان!» وپپوزيتسيالىق پارتياسىن قۇرۋ جونىندەگى باستاماشىل توپتىڭ ليدەرى مارات جىلانباەۆتىڭ ءىسى بويىنشا سوتتا ءجارىسسوز ءوتتى. سوت وتىرىسى كەزىندە پروكۋرور سۋديا سابىرجان كارىموۆتەن سوتتالۋشى مارات جىلانباەۆتى كىنالى دەپ تانىپ، 10 جىلعا باس بوستاندىعىنان ايىرۋدى سۇراعان»، - دەيدى مارات جىلانباەۆتىڭ ادۆوكاتى مەيىرجان دوسقاراەۆ.
جىلانباەۆتىڭ سوڭعى ءسوزىن ايتقان سوت وتىرىسىنا ادامدار جىبەرىلمەگەن، وتىرىس جابىق جاعدايدا وتكەن.
مارات جىلانباەۆ وسى جىلدىڭ مامىر ايىندا قاماۋعا الىنعان. پوليتسيا قاۋلىسىندا قوعام بەلسەندىسىنىڭ قازاقستاندا تىيىم سالىنعان «قازاقستاننىڭ دەموكراتيالىق تاڭداۋى» قوزعالىسىنىڭ ۇيىمداستىرۋشىلارى مەن قاتىسۋشىلارىنىڭ چاتىندا بولعانى، وسى قوزعالىستىڭ نەگىزىن قالاۋشى مۇحتار ابليازوۆپەن بايلانىستا بولعانى، سونداي-اق قوزعالىستان «قازاقستانداعى كونستيتۋتسيالىق قۇرىلىستى وزگەرتۋ» ماقساتىن "قولداعانى" ءۇشىن ايىپ تاعىلعان.
جىلانباەۆ 17 ناۋرىزدا وتكىزگەن اكتسياسى ءۇشىن 3 مامىردان بەرى اكىمشىلىك قاماۋعا الىندى. 23 ناۋرىزدا جىلانباەۆ بوستاندىققا شىعۋى كەرەك ەدى، بىراق ول بوساتىلعان جوق. كەيىن بەلگىلى بولعانداي، پوليتسيا ونى ەكسترەميزمگە قارسى كۇرەس بولىمىنە اپارىپ، سول كۇنى جىلانباەۆتىڭ ساياجايىندا ءتىنتۋ جۇرگىزىپ، فلەش-ديسك، تەلەفون جانە «العا، قازاقستان!» جازۋى بار بىرنەشە فۋتبولكا تاركىلەدى.
مارات جىلانباەۆ - 1963 جىلى 19 تامىزدا قاراعاندى وبلىسى، قارقارالى اۋدانىندا دۇنيەگە كەلگەن. 1990 جىلدارى قاراقۇم، ساحارا، ۇلكەن ۆيكتوريا جانە نەۆادا سياقتى ەڭ ۇلكەن شولدەردى باسىپ وتكەن الەمدەگى جالعىز مارافونشى. گيننەستىڭ رەكوردتار كىتابىنا جەتى رەت ەنگەن.
