الماتى سوتى وسى جىلدىڭ جازىندا اۆتوبۋسپەن بولعان جول-كولىك وقيعاسى بويىنشا ايىپتى دەپ تانىلعان انەل سارتاەۆانى تۇرمەگە قاماۋ تۋرالى ۇكىم شىعاردى، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
«المالى اۋداندىق سوتى كولىك قۇرالدارىن باسقارۋ كەزىندە جول قوزعالىسى ەرەجەلەرىن بۇزۋ سالدارىنان ابايسىزدا ادام ولىمىنە اكەپ سوققان وقيعا بويىنشا (قك 345-بابىنىڭ 3-بولىگى) ايىپتالۋشى س.-عا قاتىستى قىلمىستىق ءىستى قارادى»، - دەپ مالىمدەدى الماتى سوتىنىڭ ءباسپاسوز قىزمەتى.
ايىپتاۋعا سايكەس، سارتاەۆا «جول بەر» بەلگىسىن ەلەمەي، جولعا شىعىپ كەتكەن، سول جەردە ول قالالىق اۆتوبۋسپەن سوقتىعىسقان. اۆتوبۋس ينەرتسيامەن باعدارشامدى سوعىپ، تروتۋارعا شىعىپ، دۇكەن عيماراتىنا سوعىلعان. جولاۋشىلاردىڭ ءبىرى جەدەل جاردەم كەلگەنگە دەيىن قايتىس بولدى.
سوت بارىسىندا ايەلدىڭ كىشكەنتاي بالاسى بار ەكەنى ايتىلدى. ول ءوزىنىڭ كىناسىن مويىنداپ، سوتتان باس بوستاندىعىنان ايىرماۋدى سۇراعان. قازا تاپقان جولاۋشىنىڭ ۇلى سوتتا ايىپتالۋشىنى كەشىرىپ، ەشقانداي تالاپ قويماعان.
سوت ۇكىمى بويىنشا، س. قك 345-بابىنىڭ 3-بولىگى بويىنشا كىنالى دەپ تانىلىپ، 2 جىل 6 اي مەرزىمگە باس بوستاندىعىنان ايىرىلدى. سونداي-اق، وعان كولىك جۇرگىزۋ قۇقىعىنان 5 جىلعا ايىرۋ جازاسى تاعايىندالدى. قك 74-بابىنىڭ 1-بولىگى نەگىزىندە ۇكىمدى ورىنداۋ مەرزىمى 3 جىلعا، بالاسى 3 جاس 9 اي بولعانعا دەيىن كەيىنگە قالدىرىلدى.
ايتا كەتەيىك، انەل سارتاەۆا Salem Social Media مەدياكومپانياسىنىڭ پروديۋسەرى بولعان جانە «5:32»، «ەسكورت»، «1286» سىندى سەريالداردىڭ پروديۋسەرى رەتىندە تانىلعان.
