قاراۋىل توبەدە وتەتىن مەرەكەلىك ءىس-شارالار اياسىندا ۇلتتىق ناقىشتاعى كەڭ اۋقىمدى ەتنو-قالاشىق قۇرىلىپ، 200-دەن اسا كيىز ءۇي تىگىلەدى. بۇل تۋرالى اباي اۋدانىنىڭ اكىمى مەيىرجان سماعۇلوۆ باياندادى.
- اباي وبلىسىنىڭ قالا-اۋداندارى مەن مەكەمەلەرىنە تيەسىلى 180 كيىز ءۇي قاراۋىل توبەگە ورنالاستىرىلسا، اباي ساياباعىندا كاسىپكەرلىك جانە مۋزەيلىك باعىتتاعى قازاق ۇيلەر مەن ولكەتانۋ ەكسپوزيتسيالارى ۇيىمداستىرىلادى. سونىمەن قاتار، قولونەر شەبەرلەرى مەن ۇلتتىق بۇيىمدار وندىرۋشىلەرىنە ارنالعان ساۋدا-ساتتىق الاڭى بەلگىلەنىپ، كەلۋشىلەرگە ەتنومادەني رۋح پەن ۇلتتىق قۇندىلىقتاردى تانىستىرۋ كوزدەلگەن، - دەدى مەيىرجان سماعۇلوۆ.
8–10 تامىز كۇندەرى ارالىعىندا ارنايى قوعامدىق كولىك مارشرۋتتارى مەن كەستەلەرى بەكىتىلىپ، 12 اۆتوبۋس قىزمەت كورسەتەدى. مۇمكىندىگى شەكتەۋلى ازاماتتار ءۇشىن 10 ينۆاتاكسي تارتىلىپ، قولايلى جاعداي جاسالادى. اباي ساياباعى اۋماعىندا جالپى 6480 كولىككە ارنالعان اۆتوتۇراق ورىندارى، ايالدامالار مەن مۇمكىندىگى شەكتەۋلى ازاماتتارعا ارنالعان ايماقتار قاراستىرىلعان.
- قاراۋىل اۋىلىندا ءتارتىپ پەن قوعامدىق قاۋىپسىزدىكتى 900 اسكەري قىزمەتكەر قامتاماسىز ەتەدى. سونىمەن قاتار، 6 جەدەل جاردەم كولىگى بار مەديتسينالىق بريگادالار، 40 تج قىزمەتكەرى جانە 6 ءورت ءسوندىرۋ تەحنيكاسى جۇمىلدىرىلعان. ءىس-شارالارعا 500-گە جۋىق ەرىكتىلەر تارتىلىپ، بۇقارالىق اقپارات قۇرالدارى مەن تانىمال بلوگەرلەردىڭ قاتىسۋى ارقىلى كەڭ اۋقىمدى اقپاراتتىق قامتۋ كوزدەلگەن، - دەپ قورىتىندىلادى سپيكەر.
