قاسىم-جومارت توقاەۆ اباي وبلىسىنا كەلۋىنە وراي جولداردىڭ جەدەل جوندەلگەنىنە قاتىستى پىكىر ءبىلدىردى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
ورمانشىلاردىڭ وتباسى مۇشەلەرىنىڭ ءبىرى توقاەۆقا اۋىلدا جولدىڭ بولماعانى تۋرالى ايتتى.
ءبىزدىڭ ۋسپەنكا اۋىلىندا ەشقاشان اسفالت بولعان ەمەس. شاعال جول عانا. مۇنداعى ادامدار اسفالتتى ومىرىندە كورمەگەن. ءتىپتى قازىر ءورت سوندىرۋگە كەلگەندەردىڭ كولىگى دە دۇرىس جۇرە المادى. جول جوندەڭدەر دەپ شاعىمدانساق، وتىنىشىمىزگە قۇلاق اسقان ەمەس. ىلعي «قارجى جوق» دەپ قايتارادى. ال قازىر ءسىز كەلەدى دەگەن سوڭ جولداردى جوندەپ شىقتى، ادەمىلەپ بىلاي جاماپ قويعان. قاراڭىزشى، - دەدى ول.
مەملەكەت باسشىسى جاۋاپتىلار جازالاناتىنىن ايتتى.
مەن كەلەدى دەپ اياق استىنان جول جوندەي باستاۋ دۇرىس ەمەس. بۇل – مۇلدەم ماسقارا جاعداي. مەن بۇل تۋرالى وقىدىم، بىلەمىن. كىنالىلەر جازالانادى، - دەدى مەملەكەت باسشىسى.
ەسكە سالايىق، كەشە جەلىدە «اباي وبلىسىنا پرەزيدەنت كەلەتىن بولعان سوڭ جولدار شۇعىل جوندەلىپ، اسفالت جامالىپ جاتقانى» جايلى حابار تارادى. تەلەارنادان ارنايى سيۋجەت تە كورسەتىلدى.
وسىعان بايلانىستى اباي وبلىسىنىڭ اكىمدىگى بۇل اقپاراتتى جوققا شىعارىپ، مالىمدەمە جاساعان بولاتىن.
«بورودۋليحا-جەرنوۆكا-پوللوگ» اۋداندىق ماڭىزى بار جولىندا كولىك قۇرالدارىنىڭ، ونىڭ ىشىندە قۇتقارۋ قىزمەتى مەن ۆولونتەرلەردىڭ قوزعالىس قارقىنى ارتتى. وسىعان بايلانىستى ءورت ءسوندىرۋ شتابىنا كەلىپ-كەتەتىن اۆتوموبيل اعىنىن ەسكەرە وتىرىپ، قاۋىپسىز قوزعالىستى قامتاماسىز ەتۋ جانە ءجۇرۋ بولىگىن شاڭنان ارىلتۋ ماقساتىندا جولداعى شۇڭقىرلار ۋاقىتشا بىتەلدى، - دەپ حابارلاعان بولاتىن اكىمدىك.
