قاپشاعاي سۋ قويماسىندا جاس قىز سۋعا باتىپ كەتتى. قايعىلى جاعداي كەزىندە جاعاجايدا ءماجىلىس دەپۋتاتى باقىتجان بازاربەك تە بولعان، دەپ حابارلايدى “ادىرنا”.
دەپۋتاتتىڭ ايتۋىنشا، قىزدى سۋدان كۋاگەرلەر الىپ شىققان.
“جاعالاۋدا قاۋىپسىزدىككە جاۋاپتى ەشكىم بولمادى. قۇتقارۋشىلار، بەينەباقىلاۋ كامەرالارى، قۇتقارۋ قۇرالدارى، مەديتسينالىق قىزمەتكەر جوق. سۋ قويماسىنىڭ جاعاسى جەكە كاسىپكەرلەرگە بەرىلگەن. قىزدى سۋدان كۋاگەرلەر الىپ شىعىپ، العاشقى كومەك كورسەتۋگە تىرىستى”، — دەيدى ول.
دەپۋتات جاعاجايلاردىڭ كىمگە تيەسىلى ەكەنىن انىقتاپ، زاڭ تالاپتارىن بۇزعانداردى جاۋاپقا تارتۋ ءۇشىن تەكسەرىس جۇرگىزۋدى تالاپ ەتەتىنىن جەتكىزدى.
پوليتسيا دەپارتامەنتى قىزدىڭ ولىمىنە قاتىستى قىلمىستىق ءىس قوزعالعانىن حابارلادى.
“وقيعانىڭ بارلىق ءمان-جايىن انىقتاۋ ءۇشىن سوتقا دەيىنگى تەرگەۋ امالدارى جۇرگىزىلىپ جاتىر. پوليتسەيلەر قۇتقارۋ تەحنيكاسىنىڭ جانە كەزەكشى قۇتقارۋشىلاردىڭ بار-جوعىن، دەمالىس ايماعىنىڭ بەلگىلەنگەن قاۋىپسىزدىك تالاپتارىنا سايكەستىگىن انىقتايدى”، — دەلىنگەن حابارلامادا.
