زاڭگەر مەيىرمان شەكەەۆ الەۋمەتتىك جەلىدەگى پاراقشاسىندا ۆيدەو جاريالاپ، شوۋ-بيزنەس وكىلدەرىنىڭ قۇرىلتاي دەپۋتاتتىعىنا ۇمىتكەر بولۋى قوعامدا قىزۋ تالقىلانىپ جاتقانىن ايتتى، دەپ حابارلايدى "ادىرنا" ۇلتتىق پورتالى.
ونىڭ سوزىنشە، اسىرەسە انشىلەر اشا ماتاي مەن تامارا اساردىڭ كانديدات رەتىندە تىركەلۋى قوعامنىڭ نازارىن اۋدارعان.
"زاڭ شىعاراتىن ورگان – ادامنىڭ جەكە قالاۋىمەن باراتىن ورىن ەمەس. بۇل – حالىقتىڭ قالاۋىمەن بارىپ، حالىقتىڭ مۇددەسى ءۇشىن جۇمىس ىستەيتىن جەر", – دەدى زاڭگەر.
سونداي-اق مەيىرمان شەكەەۆ اشا ماتايدىڭ زاڭنامانى تولىق وقىپ شىققانى تۋرالى ايتقان سوزىنە كۇمان كەلتىرىپ، ونى اشىق پىكىرسايىسقا شاقىردى.
"مەن 26 جىلدان بەرى زاڭ سالاسىندا ەڭبەك ەتىپ كەلەمىن. سونىڭ وزىندە بارلىق زاڭدى تولىق وقىپ شىقتىم دەپ ايتا المايمىن. سوندىقتان اشا ماتايدى قازاقتىڭ بولاشاعىن ايقىندايتىن قۇرىلتاي ماسەلەسى بويىنشا اشىق دەباتقا شاقىرامىن", – دەدى ول.
ازىرگە اشا ماتاي زاڭگەردىڭ بۇل ۇسىنىسىنا قاتىستى رەسمي پىكىر بىلدىرگەن جوق.
ەسكە سالايىق، بۇعان دەيىن قازاقستان حالىق پارتياسى قۇرىلتاي سايلاۋىنا ۇسىنعان كانديداتتار تىزىمىنە ءانشى ءارى تەلەجۇرگىزۋشى اشا ماتاي مەن قازاقستاننىڭ حالىق ءارتىسى تامارا اسار ەنگەن.
