قازاقستاندىق عالىمدار قۋانىشبەك سارسەنباي جانە زاۋرە ءدىنوۆا ونكولوگيالىق اۋرۋلاردى ەمدەۋگە ارنالعان پرەپارات ويلاپ تاپتى. ونى London Rate حالىقارالىق باعالاۋ كومپانياسى 160 ميلليون دوللارعا (82 ملرد 848 ميلليون تەڭگە) باعالاعان، دەپ حابارلايدى “ادىرنا”.
پرەپارات بەرن كونۆەنتسياسىمەن قورعالعان 6 حالىقارالىق پاتەنتكە يە بولعان.
زەرتتەۋ ناتيجەسىندە پرەپاراتتىڭ بارلىق زەرتتەلگەن ەرىتىندىلەرىنە ەنگىزىلگەندە AGS جانە HeLa كلەتكالىق قاتەرلى ىسىك سىزىقتارىنا (ادەنوكارتسينوما) قاتىستى ايتارلىقتاي اسەر كورسەتەتىنى انىقتالدى، ياعني كلەتكالاردىڭ 88%-دان استامى ولەدى.
وسى پرەپاراتقا قازىردىڭ وزىندە اقش پەن ۇندىستانداعى الەمدىك ءىرى فارماتسەۆتيكالىق كومپانيالار قىزىعۋشىلىق تانىتقان، قازىرگى تاڭدا پرەپاراتتى ءارى قاراي دامىتۋ جانە ساتۋ بويىنشا كەلىسسوزدەر جۇرگىزىلۋدە
قۋانىشبەك سارسەنبايدىڭ ايتۋىنشا، ءدارىنىڭ نەگىزىن 1975-1980 جىلدارى ناعاشى اتاسى، 2024 جىلى قايتىس بولعان سوۆەت ءدىنوۆ قالاعان. سول كىسىنىڭ قۇرمەتىنە پرەپارات Sovetonko دەپ اتالعان.
عالىم ءدارىنى زەرتتەۋگە 5 جىلىن ارناپتى. ءدارى 2023 جىلى العاشقى زەرتحانالىق سىناقتاردان ءساتتى وتكەن. ول لەيكەميا، اسقازان قاتەرلى ىسىگى، جاتىر موينى وبىرى جانە بەركيتت ليمفوماسىمەن كۇرەستە جوعارى ناتيجە كورسەتكەن. كەي زەرتتەۋلەردە 100% ناتيجە بەرگەنى ايتىلعان.
عالىم مەملەكەتتەن قولداۋ بولماعانىن، باستاپقىدا تەك جەكە ينۆەستور كومەكتەسكەنىن ايتتى. قازىر ءدارىنى تولىق ساتىپ الۋعا شەتەلدىك كومپانيالار ۇسىنىس ءبىلدىرىپ جاتىر ەكەن. الايدا قازاقستان تاراپىنان قىزىعۋشىلىق جوق، دەيدى ازىرلەۋشى.
