Qazaqstandyq ǧalymdar Quanyşbek Särsenbai jäne Zaure Dınova onkologiialyq aurulardy emdeuge arnalǧan preparat oilap tapty. Ony London Rate halyqaralyq baǧalau kompaniiasy 160 million dollarǧa (82 mlrd 848 million teŋge) baǧalaǧan, dep habarlaidy “Adyrna”.
Preparat Bern konvensiiasymen qorǧalǧan 6 halyqaralyq patentke ie bolǧan.
Zertteu nätijesınde preparattyŋ barlyq zerttelgen erıtındılerıne engızılgende AGS jäne HeLa kletkalyq qaterlı ısık syzyqtaryna (adenokarsinoma) qatysty aitarlyqtai äser körsetetını anyqtaldy, iaǧni kletkalardyŋ 88%-dan astamy öledı.
Osy preparatqa qazırdıŋ özınde AQŞ pen Ündıstandaǧy älemdık ırı farmasevtikalyq kompaniialar qyzyǧuşylyq tanytqan, qazırgı taŋda preparatty ärı qarai damytu jäne satu boiynşa kelıssözder jürgızılude
Quanyşbek Särsenbaidyŋ aituynşa, därınıŋ negızın 1975-1980 jyldary naǧaşy atasy, 2024 jyly qaitys bolǧan Sovet Dınov qalaǧan. Sol kısınıŋ qūrmetıne preparat Sovetonko dep atalǧan.
Ǧalym därını zertteuge 5 jylyn arnapty. Därı 2023 jyly alǧaşqy zerthanalyq synaqtardan sättı ötken. Ol leikemiia, asqazan qaterlı ısıgı, jatyr moiny obyry jäne Berkitt limfomasymen küreste joǧary nätije körsetken. Kei zertteulerde 100% nätije bergenı aitylǧan.
Ǧalym memleketten qoldau bolmaǧanyn, bastapqyda tek jeke investor kömekteskenın aitty. Qazır därını tolyq satyp aluǧa şeteldık kompaniialar ūsynys bıldırıp jatyr eken. Alaida Qazaqstan tarapynan qyzyǧuşylyq joq, deidı äzırleuşı.
