شىبىندار كوروناۆيرۋس ىندەتىن ادامدارعا تاراتۋى مۇمكىن بە؟ بۇل تۋرالى الەۋمەتتىك جەلىدە تاراعان اقپاراتقا Stopfake سايتى فاكتچەكينگ جاساپ كوردى.
"شىبىندار ادام قارىم-قاتىناس جاساعاندا، تۇشكىرگەن نەمەسە جوتەلگەن كەزدە ءبولىنىپ شىعاتىن ۆيرۋس بولشەكتەرىن اۋادان جينايدى جانە ونى 24 ساعاتتىڭ ىشىندە تاراتۋى مۇمكىن. وسى جولمەن اۋرۋ جۇقتىرۋ ىقتيمالدىعى جوعارى", - دەلىنگەن اقپاراتتا.
بۇل حابارلاما اقش-تىڭ كانزاس شتاتىنىڭ عالىمدارىنىڭ زەرتتەۋلەرىنەن الىنعان دايەكسوز رەتىندە تاراتىلۋدا. ول Parasites & Vectors جۋرنالىنداعى ماقالادان الىنعان. شىن مانىندە، عالىمدار مۇنداي قورىتىندىلار جاساماعان.
زەرتتەۋ بويىنشا، تازا ەمەس سۇتكە قونعان شىبىنداردا SARS-CoV-2 بار-جوعى تەكسەرىلگەن. "سىناققا" الىنعان شىبىندار تاسىمالدانعان كونتەينەرلەردەن ۆيرۋس ءتورت جانە 24 ساعاتتان كەيىن انىقتالدى. دەمەك، شىبىندار ۆيرۋستى باسقا زاتتاردىڭ بەتتەرىنە تاسىمالداي الادى دەپ پايىمداۋعا بولادى. بۇل ءالى كۇنگە دەيىن بولجام عانا، ونى دالەلدەۋ ءۇشىن قوسىمشا تاجىريبەلەر مەن تالداۋلار قاجەت.
زەرتتەۋدىڭ ەكىنشە بولىگىندە جاندىكتەر اۋرۋ جۇقتىرعان تۇقىمداستارىمەن بايلانىستا بولعاننان كەيىن تەكسەرىلگەن. ياعني، شىبىنداردىڭ ۆيرۋستى تابيعي جولمەن جۇقتىرا الاتىنى قارالدى. مۇنىڭ ىقتيمالدىعى از نەمەسە مۇمكىن ەمەس بولىپ شىقتى.
"زەرتتەۋىمىزدىڭ ەكىنشى بولىگى شىبىنداردىڭ انىقتالعان جۇقپالى ۆيرۋستى باسقاعا جۇقتىرمايتىنىن كورسەتتى. ءبىز ۆيرۋستىڭ گەنومىن عانا تابا الدىق، ول جۇقپالى ەمەس. بولمەدەگى شىبىندار SARS-CoV-2 بەرىلۋىندە ماڭىزدى ءرول اتقاراتىندىعىنا ەشقانداي دالەل جوق", - دەيدى زەرتتەۋدىڭ تەڭ اۆتورى جانە زەرتتەۋ جەتەكشىسى دانا نايدۋچ.
جالپى، جۇقپالى اۋرۋلار بويىنشا ماماندار شىبىنداردىڭ اۋرۋدى تاسىمالداي الاتىنىنا كۇمانمەن قارايدى.
"بولمە شىبىندارى بىرقاتار ۆيرۋستار مەن باكتەريالاردى تاسىمالداي الادى، بىراق بۇل مىندەتتى تۇردە ەپيدەميولوگيالىق قاۋىپ تۋدىمايدى", - دەيدى جۇقپالى اۋرۋلار جونىندەگى ساراپشى، مەديتسينا دوكتورى امەش اداليا.
"بۇگىنگى كۇنى COVID-19 ۆيرۋسى بولمە شىبىندارى ارقىلى جۇعاتىنىنا ەشقانداي دالەل نەمەسە اقپارات جوق. COVID-19 تۋدىراتىن ۆيرۋس نەگىزىنەن ىندەت جۇقتىرعان ادام جوتەلگەن، تۇشكىرگەن نەمەسە سويلەسكەن كەزدە ءبولىنىپ شىعاتىن تامشىلار ارقىلى تارالادى. سونىمەن قاتار، قول جۋماس بۇرىن اۋرۋ ادام ۇستاعان زاتقا قول تيگىزىپ، سودان كەيىن كوزىڭىزدى، مۇرنىڭىزدى نەمەسە اۋزىڭىزدى ۇستاۋ ارقىلى بەرىلەدى. ءوزىڭىزدى قورعاۋ ءۇشىن باسقالاردان كەمىندە 1 مەتر قاشىقتىقتا ءجۇرىڭىز جانە قولىڭىز تيەتىن زاتتاردىڭ بەتتەرىن ءجيى زارارسىزداندىرىپ وتىرىڭىز. قولىڭىزدى كوزىڭىزگە، اۋزىڭىزعا جانە مۇرنىڭىزعا تيگىزبەستەن مۇقيات جانە ءجيى جۋىڭىز", - دەلىنگەن ددسۇ سايتىندا.
"ادىرنا" ۇلتتىق پورتالى
