پارلامەنت سەناتىنىڭ دەپۋتاتى ولگا بۋلاۆكينا شىعىس قازاقستان وبلىسىنىڭ شەكارالىق اۋداندارىندا تۇرىپ جاتقان حالىقتىڭ دەنى كورشى ەلدىڭ تەلەارنالارىن كورىپ، يدەولوگياسىمەن «ۋلانىپ» جاتقانىنا الاڭداۋشىلىق ءبىلدىردى، دەپ حابارلايدى "ادىرنا" ۇلتتىق پورتالى F16.kz سايتىنا سىلتەپ.
سونداي-اق سەناتور ءوڭىر تۇرعىندارىنىڭ اراسىندا بالاسىن كورشى ەلدىڭ وقۋ ورىندارىنا جىبەرەتىندەر دە از ەمەس ەكەنىن ايتىپ دابىل قاقتى. ونىڭ سوزىنشە، بۇل جاعداي قازاقستانعا قاۋىپتى.
"ول جاقتا ينتەرنەتتى قويىپ قازاقستاندىق تەلەارنالار جوق. بۇل اۋىلدار كورشى ەلدىڭ تەلەارنالارىن كورەدى، سايكەسىنشە ادامدار سول ەلدىڭ بۇكىل يدەولوگياسىن ءسىڭىرىپ جاتىر. بالالارىن كورشى ەلگە وقۋعا جىبەرەدى. ەندى سۇراق، بۇل ماسەلەنى قالاي شەشپەكسىزدەر؟ ويتكەنى بۇل بۇگىن پايدا بولعان ماسەلە ەمەس", – دەدى ولگا بۋلاۆكينا جۋىردا وتكەن جيىنداردىڭ بىرىندە.
الايدا سەناتوردىڭ كورشى ەل دەپ وتىرعانى قازاقستانمەن ىرگەلەس جاتقان مەملەكەتتەردىڭ قايسىسى ەكەنى بەلگىسىز، دەپۋتات ناقتى اتاپ كورسەتپەدى. دوڭگەلەك ۇستەلگە قاتىسىپ وتىرعاندار مۇنى تەرىسكەيدەگى ستراتەگيالىق سەرىكتەس – رەسەي فەدەراتسياسى دەپ ءتۇسىندى. ويتكەنى شىعىس قازاقستاننىڭ شەكارالىق اۋداندارىندا بۇرىننان رەسەيلىك تەلەارنالار كورسەتەدى.
