جوعارعى سوتتىڭ بۇرىنعى توراعاسى، سەناتور جاقىپ اسانوۆ كىسى قولىنان قازا تاپقان شەرزات بولاتتىڭ ولىمىنە قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىدە سەناتوردىڭ "حۋتور" بانداسىنىڭ باسشىسىمەن تۋىستىق قاتىناسى بار دەگەن اقپارات تاراعان. جاقىپ اسانوۆ “حۋتور” بانداسىنىڭ باسشىسى دەگەن كۇدىككە ىلىنگەن حاسان قاسىمبەكوۆكە تۋىستىق قاتىناسى بارى تۋرالى اقپاراتتى جوققا شىعاردى.
“بۇل اقپارات تۋرالى ءبىرىنشى كۇنى-اق ەستىدىم. مەن بۇعان قاتىستى پىكىر بىلدىرۋدەن باس تارتتىم. ويتكەنى مۇنىڭ ءبارى وتىرىك، جالعان. ونى تانىمايمىن، بىلمەيمىن، كورگەن ەمەسپىن. قازىر الەۋمەتتىك جەلىدە جالعان اقپارات كوپ. ونىڭ بارىنە سەنە بەرۋگە بولمايدى. بىراق كىم بىلەدى؟ بىرەۋ مەنىڭ اتىمدى شىعارايىن دەگەن شىعار. ماسەلە تەك مەندە ەمەس. جالپى وتىرىك نارسە كوپ. ونىڭ بارلىعى تەرگەۋ امالدارىن جۇرگىزۋگە كەدەرگى جاسايدى”، – دەيدى سەناتور.
جاقىپ اسانوۆ شەرزات بولاتتىڭ ايۋاندىقپەن ولتىرىلۋىنە بايلانىستى پىكىر ءبىلدىردى.
“تالعارداعى وتە قيىن جاعداي. قياناتتىڭ قياناتى. جاپ-جاس مەكتەپتەگى بالانى ەرەسەك بىرنەشە ەركەكتەر جابىلىپ ۇرىپ، اكە-شەشەسىنىڭ قولىن بايلاپ، كوزىنشە ولتىرگەنى وتە اۋىر. قازانىڭ جەڭىلى جوق دەيدى. دەسە دە بۇل اۋىر جاعداي”، – دەيدى جاقىپ اسانوۆ.
سەناتور 16 جاستاعى شەرزات بولاتتىڭ ولىمىنە قاتىستى سوتتىڭ اشىق رەجيمدە، ونلاين وتۋىنە قاتىستى پىكىر ءبىلدىردى.
“پروكۋراتۋرا سوتتىڭ اشىق ءوتۋىن سۇرايمىز دەپ ايتىپ قالدى. بىراق ونى سۋديا شەشەدى. ول تۋرالى مەنىڭ ايتقانىم ورىنسىز بولادى. ويتكەنى ونى سول ءىس بويىنشا توراعالىق ەتەتىن سۋديا شەشەدى”، – دەدى جاقىپ اسانوۆ.
