موڭعوليادا پرەزيدەنت ۋحنااگين حۋرەلسۋحتىڭ قامقورلىعىمەن «موڭعولتانۋ: ءداستۇر جانە قازىرگى زامان» تاقىرىبىنداعى XIII حالىقارالىق موڭعولتانۋشىلار كونگرەسى باستالدى، دەپ حابارلايدى "ادىرنا" ءتىلشىسى.
كونگرەسكە الەمنىڭ 30-دان استام ەلىنەن 600-گە جۋىق عالىم قاتىسىپ جاتىر. عىلىمي جيىن بارىسىندا 530-دان استام بايانداما ۇسىنىلىپ، موڭعول ءتىلى، ارحەولوگيا، مادەنيەت، ونەر، ادەبيەت، ەتنوگرافيا، ءداستۇرلى ءبىلىم، قازىرگى موڭعول قوعامى جانە حالىقارالىق قاتىناستار ماسەلەلەرى تالقىلانادى.
10 تامىز كۇنى اشىلۋ راسىمىندە موڭعوليا پرەزيدەنتى موڭعول حالقىنىڭ تاريحى، ءتىلى، مادەنيەتى مەن تۇرمىسىن زەرتتەپ جۇرگەن عالىمدارعا العىس ءبىلدىردى. ول موڭعولتانۋشىلار سالاسىنداعى حالىقارالىق جانە وڭىرلىك ىنتىماقتاستىقتى كۇشەيتۋ، بىرلەسكەن جوبالاردى جۇزەگە اسىرۋ جانە جاس عالىمداردى قولداۋ قاجەتتىگىن اتاپ ءوتتى.
موڭعوليا عىلىم اكادەمياسىنىڭ پرەزيدەنتى س.دەمبەرەل موڭعولتانۋدىڭ بولاشاعى حالىقارالىق عىلىمي ىنتىماقتاستىققا، جاس زەرتتەۋشىلەردى دايارلاۋعا جانە جاساندى ينتەللەكت، ۇلكەن دەرەكتەر مەن جاڭا زەرتتەۋ ادىستەرىن قولدانۋعا بايلانىستى ەكەنىن ايتتى.
كونگرەسس 13 تامىزعا دەيىن جالعاسادى.
ءىس-شارا بارىسىندا موڭعولتانۋشىلار عىلىمىنىڭ دامۋىنا ەلەۋلى ۇلەس قوسقان شەتەلدىك عالىمدار موڭعوليانىڭ مەملەكەتتىك ناگرادالارىمەن ماراپاتتالدى. ولاردىڭ قاتارىندا اقش، قىتاي، رەسەي، جاپونيا، گەرمانيا، وڭتۇستىك كورەيا، يزرايل جانە باسقا ەلدەردىڭ عالىمدارى بار.
اتاپ ايتقاندا، اقش-تىڭ ينديانا ۋنيۆەرسيتەتىنىڭ اعا وقىتۋشىسى لەگدەنگين تسەرەنچۋنتقا «ەڭبەك سىڭىرگەن ۇستاز» اتاعى بەرىلدى. بىرقاتار شەتەلدىك عالىم «پوليار جۇلدىزى» وردەنىمەن جانە «دوستىق» مەدالىمەن ماراپاتتالدى.
