قازاقستاندىق تەننيسشى بەيبىت جۇقاەۆ تۇڭعىش رەت «ۇلكەن دۋلىعا» ساناتىنا كىرەتىن ۋيمبلدون ءتۋرنيرىنىڭ نەگىزگى كەزەڭىنە جولداما الدى. ATP رەيتينگىندە 251-ورىندا تۇرعان سپورتشى ىرىكتەۋ كەزەڭىنىڭ شەشۋشى ماتچىندا فرانتسيالىق لۋكا ءپاۆلوۆيچتى 3:6, 6:3, 6:2, 7:6 (7:5) ەسەبىمەن جەڭىپ شىقتى، دەپ حابارلايدى “ادىرنا”.
24 جاستاعى تەننيسشى ءۇشىن بۇل – تاريحي ءسات. بىلتىر ءدال وسى ءتۋرنيردىڭ ىرىكتەۋ فينالىندا فرانتسۋز اليس كانتەنگە جول بەرىپ، نەگىزگى كەزەڭگە وتە الماي قالعان ەدى. بيىل ول قاتەلىگىن قايتالاماي، ەكىنشى مۇمكىندىگىن ءتيىمدى پايدالاندى.
وكىنىشكە قاراي، ميحايل كۋكۋشكين، دميتري پوپكو جانە تيموفەي سكاتوۆ ىرىكتەۋ كەزەڭىندە ءساتسىز ونەر كورسەتىپ، ۋيمبلدون ءتۋرنيرىنىڭ نەگىزگى جارىسىنا وتە المادى.
ۋيمبلدون كورتتارىندا بەيبىت جۇقاەۆپەن بىرگە ەل نامىسىن كەلەسى تەننيسشىلەر قورعايدى:
- الەكساندر بۋبليك;
- الەكساندر شەۆچەنكو;
- ەلەنا رىباكينا;
- يۋليا پۋتينتسەۆا;
- اننا دانيلينا (جۇپتىق سىندا).
سونداي-اق جاسوسپىرىمدەر اراسىنداعى باسەكەدە قازاقستاننان ءامىر ومارحانوۆ، زاڭعار نۇرلانۇلى جانە دامير جالعاسباي (ىرىكتەۋ كەزەڭىندە) ونەر كورسەتەدى.
