بۇرىنعى ءماجىلىس دەپۋتاتى، قازىرگى شىمكەنت قالاسى اكىمىنىڭ ورىنباسارى رۋسلان بەردەنوۆ Respublica پارتياسىنىڭ تەڭ توراعاسى قىزمەتىنەن كەتتى، دەپ حابارلايدى «ادىرنا» ءتىلشىسى.
بەردەنوۆ بۇل شەشىمنىڭ بىرقاتار وبەكتيۆتى سەبەپتەرگە بايلانىستى قابىلدانعانىن اتاپ ءوتتى.
«بىرىنشىدەن، بەلگىلى بولعانداي، قازىرگى ۋاقىتتا مەن شىمكەنت قالاسى اكىمىنىڭ ورىنباسارى قىزمەتىن اتقارىپ كەلەمىن. قولدانىستاعى زاڭناما تالاپتارىنا سايكەس، مەملەكەتتىك قىزمەتتى ساياسي پارتياداعى جەتەكشىلىك قىزمەتپەن قاتار الىپ جۇرۋگە جول بەرىلمەيدى. مەن زاڭ تالاپتارىن قۇرمەتتەيمىن جانە ونى قاتاڭ ساقتايمىن.
ەكىنشىدەن، پارتيانىڭ ىشكى قاعيداتتارىنا سايكەس، پارتيا مۇشەلەرى مەملەكەتتىك ورگانداردا لاۋازىمدى قىزمەت اتقارا المايدى. ءبىز ساياسي ۇدەرىستەرگە قاتىسۋ پارتيا ىشىندەگى بيلىك قۇرىلىمىمەن ارالاسپاۋى ءتيىس دەپ سانايمىز.
ۇشىنشىدەن، قازىرگى تاڭدا ءوز دەنساۋلىعىمدى قالپىنا كەلتىرۋگە باسا نازار اۋدارىپ ءجۇرمىن. مەن ءاردايىم جۇمىسىما جوعارى جاۋاپكەرشىلىكپەن قاراپ كەلدىم، بۇدان كەيىن دە مەملەكەتتىك قىزمەتتەگى لاۋازىمىمدى ءوز دەڭگەيىندە اتقارۋىم كەرەك. سوندىقتان دا ءدال قازىر ءوزىمدى جاقسى سەزىنۋ ءۇشىن كۇش-قۋاتىمدى سوعان سالۋدامىن»،—دەدى ول.
شەنەۋنىك Respublica كومانداسىنا زور تابىس تىلەپ، بىرگە جۇمىس ىستەگەن ارىپتەستەرىنە العىس ايتتى.
ول بيىل 24 اقپاندا شىمكەنت قالاسى اكىمىنىڭ ورىنباسارى بولىپ تاعايىندالعان ەدى. 26 اقپان كۇنى پارلامەنت ءماجىلىسىنىڭ جالپى وتىرىسىندا رۋسلان بەردەنوۆتىڭ دەپۋتاتتىق وكىلەتتىگى توقتاتىلعانى بەلگىلى بولدى.
ەسكە سالايىق، 22 ساۋىرگە قاراعان ءتۇنى شىمكەنت اكىمىنىڭ ورىنباسارىنا شابۋىل جاسالعان بولاتىن. كۇدىكتى شەنەۋنىككە «سايگا-12» اڭشى مىلتىعىنان ءۇش رەت وق اتقان. 12 مامىردا رۋسلان بەردەنوۆ اۋرۋحانادان شىقتى. بۇل دەرەك بويىنشا قىلمىستىق ءىس قوزعالدى.
