Būrynǧy Mäjılıs deputaty, qazırgı Şymkent qalasy äkımınıŋ orynbasary Ruslan Berdenov Respublica partiiasynyŋ teŋ töraǧasy qyzmetınen kettı, dep habarlaidy «Adyrna» tılşısı.
Berdenov būl şeşımnıŋ bırqatar obektivtı sebepterge bailanysty qabyldanǧanyn atap öttı.
«Bırınşıden, belgılı bolǧandai, qazırgı uaqytta men Şymkent qalasy äkımınıŋ orynbasary qyzmetın atqaryp kelemın. Qoldanystaǧy zaŋnama talaptaryna säikes, memlekettık qyzmettı saiasi partiiadaǧy jetekşılık qyzmetpen qatar alyp jüruge jol berılmeidı. Men zaŋ talaptaryn qūrmetteimın jäne ony qataŋ saqtaimyn.
Ekınşıden, partiianyŋ ışkı qaǧidattaryna säikes, partiia müşelerı memlekettık organdarda lauazymdy qyzmet atqara almaidy. Bız saiasi üderısterge qatysu partiia ışındegı bilık qūrylymymen aralaspauy tiıs dep sanaimyz.
Üşınşıden, qazırgı taŋda öz densaulyǧymdy qalpyna keltıruge basa nazar audaryp jürmın. Men ärdaiym jūmysyma joǧary jauapkerşılıkpen qarap keldım, būdan keiın de memlekettık qyzmettegı lauazymymdy öz deŋgeiınde atqaruym kerek. Sondyqtan da däl qazır özımdı jaqsy sezınu üşın küş-quatymdy soǧan saludamyn»,—dedı ol.
Şeneunık Respublica komandasyna zor tabys tılep, bırge jūmys ıstegen ärıptesterıne alǧys aitty.
Ol biyl 24 aqpanda Şymkent qalasy äkımınıŋ orynbasary bolyp taǧaiyndalǧan edı. 26 aqpan künı Parlament Mäjılısınıŋ jalpy otyrysynda Ruslan Berdenovtıŋ deputattyq ökılettıgı toqtatylǧany belgılı boldy.
Eske salaiyq, 22 säuırge qaraǧan tünı Şymkent äkımınıŋ orynbasaryna şabuyl jasalǧan bolatyn. Küdıktı şeneunıkke «Saiga-12» aŋşy myltyǧynan üş ret oq atqan. 12 mamyrda Ruslan Berdenov auruhanadan şyqty. Būl derek boiynşa qylmystyq ıs qozǧaldy.
