شىمكەنتتە قالا اكىمىنىڭ ورىنباسارى رۋسلان بەردەنوۆكە جاسالعان قاستاندىق ىسىنە بايلانىستى سوت پروتسەسى جالعاسىپ جاتىر. ءىس بويىنشا ايىپتالۋشى ەرلان جيەمباي سوتتا ءوز نۇسقاسىن ايتىپ، مالىمدەمە جاسادى، دەپ حابارلايدى "ادىرنا" ۇلتتىق پورتالى.
سوت وتىرىسى اشىق رەجيمدە مەملەكەتتىك تىلدە ءوتىپ جاتىر. رۋسلان بەردەنوۆ سوتقا قاتىسپادى، سەبەبى قازىرگى تاڭدا ەمدەلىپ جاتىر. بۇل تۋرالى ونىڭ وكىلى جەڭىس تىنىبەك مالىمدەدى.
ايىپتالۋشىنىڭ ايتۋىنشا، قاقتىعىستىڭ باسى 2024 جىلدىڭ ناۋرىزىندا باستالعان. بەردەنوۆ ونىڭ ايەلى لۋيزا الدانوۆانىڭ Instagram-داعى سۋرەتىنە لايك باسىپ، "سەن ادەمىسىڭ" دەپ پىكىر قالدىرعان. بۇل حابارلاما وتباسى ىشىندە جانجال تۋعىزعان.
جۇمىس بارىسىندا دا جيەمباي مەن بەردەنوۆ اراسىندا جوعارى دەڭگەيدەگى جانجال بولعان. ايىپتالۋشىنىڭ ايتۋىنشا، ءبىر كۇنى بەردەنوۆ ونى كابينەتىنە شاقىرىپ، "سەن قايدان شىقتىڭ؟" دەگەن سياقتى قورلاۋ سيپاتىنداعى سوزدەر ايتقان. ءتىپتى، "سەن تۇرمەگە كەتەسىڭ، ايەلىڭ جەزوكشە بولادى، بالالارىڭ جەتىم قالادى" دەپ اۋىر سوزدەر ايتقانى مالىمدەلدى.
ەرلان جيەمباي وق اتۋدى الدىن الا جوسپارلاماعانىن ايتىپ، ءوزىن كيللەر رەتىندە پايدالانعىسى كەلگەن ادامدار بولعانىن مالىمدەدى. ونىڭ ايتۋىنشا، رۋسلان بەردەنوۆ ودان عابيت سىزدىقباەۆتى ايىپتايتىن جالعان مالىمدەمە جاساۋىن سۇراعان.
«سەن سونى ايتساڭ، مەن سەنى كەشىرەمىن، قۇتقارامىن» دەدى دەپ ايتتى ول.
ايىپتالۋشى وقيعا كەزىندە ماس بولماعانىن، تەك قىمىز ىشكەنىن ايتتى.
ەسكە سالا كەتسەك، 2024 جىلدىڭ كوكتەمىندە رۋسلان بەردەنوۆكە قارۋلى شابۋىل جاسالعان بولاتىن. كۇدىكتى رەتىندە ونىڭ بۇرىنعى قىزمەتكەرى ەرلان جيەمباي ۇستالدى. قازىر بۇل ءىس بويىنشا قوسىمشا تەرگەۋ تالاپ ەتىلىپ وتىر.
