تۇركيا پرەزيدەنتى رەجەپ تايىپ ەردوعان مەن ارمەنيا پرەمەر-ءمينيسترى نيكول پاشينيان ىستانبۇلدا ەكىجاقتى كەلىسسوز وتكىزدى، دەپ حابارلايدى "ادىرنا" ۇلتتىق پورتالى.
بۇل كەزدەسۋدى ارمەنيا پارلامەنتىنىڭ توراعاسى الەن سيمونيان تاريحي وقيعا دەپ باعالاپ، پاشينياننىڭ تۇركياعا جاساعان العاشقى رەسمي ساپارى ەكەنىن اتاپ ءوتتى.
پاشينيان تۇركياعا ەردوعاننىڭ ارنايى شاقىرۋىمەن كەلگەن. كەزدەسۋ دولماباحچە سارايىندا ءوتتى. كەلىسسوز بارىسىندا تاراپتار تۇركيا مەن ارمەنيا اراسىنداعى قاتىناستاردى قالىپقا كەلتىرۋ جولدارىن، ايماقتاعى تۇراقتىلىق پەن بەيبىتشىلىكتى قامتاماسىز ەتۋ ماسەلەلەرىن، سونداي-اق وڭتۇستىك كاۆكازداعى گەوساياسي احۋالدى تالقىلادى.
ەردوعان ءوز سوزىندە ازەربايجان مەن ارمەنيا اراسىنداعى بەيبىت كەلىسسوزدەر بارىسىندا قول جەتكىزىلگەن ناتيجەلەردىڭ ماڭىزدىلىعىنا توقتالىپ، تۇركيانىڭ ايماقتا عانا ەمەس، بۇكىل تاياۋ شىعىستا بەيبىتشىلىكتى قامتاماسىز ەتۋ جولىندا بارلىق ديپلوماتيالىق تەتىكتەردى پايدالانۋعا دايىن ەكەنىن جەتكىزدى. ول يزرايل مەن يران اراسىنداعى اسكەري شيەلەنىستىڭ ءورشۋى ايماققا ۇلكەن قاۋىپ ءتوندىرىپ وتىرعانىن جانە ونى تەجەۋ ءۇشىن بەلسەندى ديالوگ قاجەت ەكەنىن اتاپ ءوتتى.
ءوز كەزەگىندە نيكول پاشينيان الەۋمەتتىك جەلىدەگى پاراقشاسىندا تۇركيا پرەزيدەنتىمەن كەزدەسۋدە ەكى ەل اراسىنداعى قارىم-قاتىناستاردى قالىپقا كەلتىرۋ، ايماقتىق تۇراقتىلىق جانە تۇراقتى ديالوگتىڭ ماڭىزدىلىعى تۋرالى پىكىر الماسقانىن جازدى. ول ارمەنيانىڭ بەيبىتشىلىك پەن ىنتىماقتاستىقتى قولدايتىنىن ايتتى.
