ءوز تۋعان وتانىنا ورالعان قانداستار ەل ازاماتتىعىن راستايتىن قۇجاتتى ءبىر جىلدان بەرى الا الماي شۋ شىعاردى، دەپ حابارلايدى “ادىرنا” ۇلتتىق پورتالى.
كتك تەلەارناسىنىڭ مالىمەتىنشە، سالتانات تەلەشباەۆانى مەملەكەتتىك ەمحانالار تىركەۋگە المايدى. باسى اۋىرىپ، بالتىرى سىزداسا كەلىنشەك ۇيىندە ەمدەلۋگە ءماجبۇر. ءۇش بالاسىن دا جەكەمەنشىك بالاباقشا مەن مەكتەپكە بەرگەن. سەبەبى وزبەكستاننان قونىس اۋدارعان ايەل ازاماتتىق الا الماي ءجۇر.
«جەكەمەنشىككە بارامىز. باسقا جەر ءبىزدى قابىلدامايدى. ەمدەلۋدىڭ ءوزى قيىن. بوساندىم. ونى دا جەكەمەنشىككە باردىق. 300 مىڭ تەڭگە كەتتى. ۇكىمەتتىڭ پەرزەنتحاناسىنا بارۋ ءۇشىن قۇجاتىمىز جوق. بازا ىستەمەي جاتىر دەپ ءبىر جىل ءجۇردى. سوسىن كەلدىك. ءبىر جەتىدەن كەيىن كەلىڭدەر. ءبىر جەتىدەن كەيىن كەلەمىز. ەرتەڭ كەلىڭدەر دەيدى. سول ايتاتىن اڭگىمەلەرى»، - دەيدى سالتانات تەلەشباەۆا.
قانداستاردان قۇجات قابىلدايتىن جەردە كۇندە ايعاي-شۋ. ويتكەنى، قىزمەتكەر جەتىسپەيدى. وعان قوسا، جۇيە دە ءجيى ىستەن شىعاتىنىن كوشى-قون قىزمەتىنىڭ وكىلدەرى جاسىرمايدى.
«ازاماتتىق الۋ ەكى ايعا سوزىلۋ كەرەك. بىراق بازاعا بايلانىستى سوزىلىپ كەتكەن. ىحتيار حات پەن ازاماتتىققا جاۋاپتى قىزمەتكەر ءوزىنىڭ ءوتىنىشى بويىنشا جۇمىستان شەتتەتىلدى. جاقىن ارادا ورنىنا ادام كەلەدى. ونى باسشى قۇرامى جاقىن ارادا شەشەدى دەپ ويلايمىن»، - دەيدى جامبىل اۋداندىق كوشى-قون قىزمەتىنىڭ اعا ينسپەكتورى باقبەرگەن تاتتىباەۆ.
“ادىرنا” ۇلتتىق پورتالى
