Óz týǵan Otanyna oralǵan qandastar el azamattyǵyn rastaıtyn qujatty bir jyldan beri ala almaı shý shyǵardy, dep habarlaıdy “Adyrna” ulttyq portaly.
KTK telearnasynyń málimetinshe, Saltanat Teleshbaevany memlekettik emhanalar tirkeýge almaıdy. Basy aýyryp, baltyry syzdasa kelinshek úıinde emdelýge májbúr. Úsh balasyn da jekemenshik balabaqsha men mektepke bergen. Sebebi Ózbekstannan qonys aýdarǵan áıel azamattyq ala almaı júr.
«Jekemenshikke baramyz. Basqa jer bizdi qabyldamaıdy. Emdelýdiń ózi qıyn. Bosandym. Ony da jekemenshikke bardyq. 300 myń teńge ketti. Úkimettiń perzenthanasyna barý úshin qujatymyz joq. Baza istemeı jatyr dep bir jyl júrdi. Sosyn keldik. Bir jetiden keıin kelińder. Bir jetiden keıin kelemiz. Erteń kelińder deıdi. Sol aıtatyn áńgimeleri», - deıdi Saltanat Teleshbaeva.
Qandastardan qujat qabyldaıtyn jerde kúnde aıǵaı-shý. Óıtkeni, qyzmetker jetispeıdi. Oǵan qosa, júıe de jıi isten shyǵatynyn kóshi-qon qyzmetiniń ókilderi jasyrmaıdy.
«Azamattyq alý eki aıǵa sozylý kerek. Biraq bazaǵa baılanysty sozylyp ketken. Yhtııar hat pen azamattyqqa jaýapty qyzmetker óziniń ótinishi boıynsha jumystan shettetildi. Jaqyn arada ornyna adam keledi. Ony basshy quramy jaqyn arada sheshedi dep oılaımyn», - deıdi Jambyl aýdandyq kóshi-qon qyzmetiniń aǵa ınspektory Baqbergen Táttibaev.
“Adyrna” ulttyq portaly
