تۋعان جەردىڭ دامۋىنا ايرىقشا ات سالىسۋ – شىنايى ءپاتريوتيزمنىڭ بەلگىسى. ەلىم، جەرىم دەپ ماقتانعان ءبىر بولەك، كىندىك قانىڭ تامعان جەرگە قىزمەت ەتۋ اسا ماڭىزدى. بۇل تۋرالى اقتوبە وبلىسىنىڭ تۇرعىنى، كاسىپكەر التىنبەك مۇستافين ايتتى.
التىنبەك مۇستافين كاسىبىن 13 جىل بۇرىن كىشكەنتاي ازىق-تۇلىك دۇكەنىن اشۋدان باستاعان. بۇگىندە ۇلكەن ءىرى ازىق-تۇلىك جانە شارۋاشىلىق سۋپەرماركەتى، بالالارعا ارنالعان كيىم برەندى مەن ناۋبايحاناسى بار. كۇزەتشىلىكتەن ءىرى كاسىپكەرگە اينالعان ازامات جەتىستىككە جەتۋدىڭ قۇپياسىن «ادىرنا» ۇلتتىق پورتالىنىڭ تىلشىسىنە ايتىپ بەردى.
«اقتوبە وبلىسى تەمىر اۋدانى شۇبارقۇدىق كەنتىندە دۇنيەگە كەلدىم. وسىندا ءوستىم، ءبىلىم الدىم. تۋعان جەرىمە ەڭبەگىمدى سىڭىرگىم كەلدى. العاشىندا كۇزەتشى بولىپ قىزمەت ەتتىم. كەيىن 2003 جىلى اسكەرگە بارىپ كەلگەننەن كەيىن تەمىر جول كۋرسىن وقىپ الدىم. وقۋىم كادەمە جاراپ، سول سالادا جۇمىسقا دا تۇردىم. نەگىزگى ماماندىعىم - كەدەن ءىسى. الايدا، بۇل سالادا مۇلدە جۇمىس ىستەمەگەنمىن. 2005-2006 جىلدارى ەڭ جاقسى تابىس – تەمىرجولدا بولاتىن. جالاقىم تولەۋگە جەتەتىن بولعاندىقتان نەسيە الىپ، العاشقى كاسىبىمىزدى باستادىق. 2008 جىلى اۋىلىمىزدان كىشكەنە عانا جەردى جالعا الىپ، ازىق-تۇلىك دۇكەنىن اشتىق. وسىلايشا، ماڭداي تەرمەن بىرتىندەپ كاسىبىمىزدى كەڭەيتە باستادىق»، - دەيدى كاسىپكەر.
التىنبەكتىڭ كاسىپ باستاۋىنا بالا ارمانى سەبەپ بولعان. ۇنەمى ءوزى وقيتىن كىتاپتاردان دامىعان مەملەكەتتى كورەتىن ول ەلىنىڭ ەشتەڭەدەن مۇقتاج بولماعانىن قالاعان.
«مەن كىشكەنتاي كەزدە كوپ ارماندايتىن ەدىم. سونىمەن قاتار، كىتاپتاردى كوپ وقيتىن بولدىم. 90-شى جىلدارى امەريكا سىندى الپاۋىت ەلدەردىڭ دامىپ كەتكەنىن كورىپ، كىتاپتان وقىدىق. سول كەزدە كاسىپكەر بولامىن، ەلىمدى دامىتامىن دەيتىنمىن. مەنىڭ ارماندارىم بۇگىنگى كۇنگە جەتۋىمە كومەگىن تيگىزدى»، - دەيدى ول.
التىنبەك ەڭ العاشقى دۇكەندەرىندە بار تىرلىكتى جۇبايى ەكەۋى ىستەگەنىن ايتىپ بەردى. كەلىنشەگى كاسسادا تۇرسا، التىنبەك كۇندىز تەمىرجولداعى قىزمەتىندە بولىپ، كەشكە جۇك تاسىعان. ءتىپتى بۇل سالادا ءبىلىمى بولماسا دا، تاۋەكەلگە بەل بۋىپ، ءاردايىم ەڭبەك ەتە بەرگەن. بيزنەسمەن كەزىندە قانشالىقتى قيىن بولسا دا، قازىر وسى ىسىنە ماقتاناتىنىن دا اتاپ ءوتتى.
«بارىمىزگە بەلگەلى، اۋىلدىق جەردە قارىزعا الۋشىلار كوپ. كىرىستەن قاراعاندا قارىز داپتەرىمىزدەگى تۇتىنۋشىلاردىڭ بەرۋ كەرەك قارىزدارى كوپ بولدى. ولار قارىزدارىن قايتارىپ تا بولمايدى. ال ءبىز قاي اداممەن ايقالاسىپ جۇرمەكپىز؟ سودان ، «وسى جەردەن قويا سالايىق» دەگەن دە وي بولدى. ويتكەنى، مەنىمەن بىرگە تەمىرجولدا جۇمىس ىستەيتىن ارىپتەستەرىمنىڭ جاعدايى مەننەن جاقسى بولدى. ال مەندە كاسىپ بولسا دا، سالىستىرمالى تۇردە ولاردان تومەن سەزىندىم. الايدا جۇبايىم قولداۋ ءبىلدىرىپ، ارى قاراي جالعاستىرۋعا كىرىستىك»، دەپ ەسكە الدى ول.
التىنبەك ءمۇستافيننىڭ ايتۋىنشا، جۇرەگىندە ماحابباتى بار كاسىپكەرلەر قاشاندا تابىستى بولادى. ويتكەنى، ولاردىڭ وتباسىنا، تۋعان جەرىنە، مەملەكەتىنە دەگەن ماحابباتى ءبارىن باسىپ وزادى. ولاردى دامىتامىن، «ولارعا قايتسەم كومەكتەسە الام؟» دەگەن وي مازا بەرمەيدى.
«قولداعى قارىز داپتەردى ۇمىتىپ، ونى لاقتىردىق. الدا تاۋەكەل دەپ، كەلەسى نەسيەمىزدى الىپ، ۇلكەن شاعىن ماركەتىن اشتىق. ارينە، تاۋەكەلگە بارۋ قورقىنىشتى بولدى. ويتكەنى، قولىمىزداعى ءبارىن كەپىلگە قويىپ، نەسيە الىپ، عيمارات سالدىق. بۇل جولى دۇكەنىمىزدى اۆتوماتتاندىردىق. اۆتوماتتاندىرعاننان كەيىن حالىق تا قارىزعا الۋىن قويدى. ويتكەنى، ەشكىم اۆتوماتتى الداي المايدى»، - دەيدى كاسىپكەر.
كىشكەنتاي دۇكەنىن ۇلكەن سۋپەرماركەتكە اينالدىرعانىنا بيىل 2 جىل. ال شاعىنماركەتتىڭ قىزمەت ەتىپ كەلە جاتقانىنا 5 جىلدان استى. التىنبەك مۇستافين قوسىمشا بيزنەسىن دامىتۋ ءۇشىن الەۋمەتتىك جەلىنىڭ كومەگى كوپ ەكەنىن ايتادى. ناۋبايحاناسىنداعى ءتۇرلى تورتتار مەن بالىشتەردىڭ سۋرەتتەرىن الەۋمەتتىك جەلىگە جاريالاۋ ارقىلى حالىقتى تارتۋعا بولاتىنىن دا جاسىرمادى. ايتۋىنشا، قازىر كاسىبى اۋدانداعى ءبىرىنشى ناۋبايحاناعا اينالىپ ۇلگەرگەن. جالعىز ناۋبايحانا ەمەس، اۋىلداعى بارلىق دۇكەنىنىڭ تۇتىنۋشىلارى كوپ.
«تۋعان جەرگە تۋىڭدى تىك»
التىنبەك مۇستافين قازىر اقتوبە وبلىسى تەمىر اۋدانى شۇبارقۇدىق كەنتىندەگى جاستارعا قولداۋ كورسەتۋدە. ول ءۇشىن «100 dos Shubar» قايىرىمدىلىق قورىن اشىپ، اۋدانداعى جاستاردى ءبىر ورتاعا جيناۋدا. قوعامدىق قور اۋىلدىڭ سپورتشى جانە دارىندى جاستارىن قولداپ، اۋداننىڭ كومەككە مۇقتاج ادامدارىنا كومەك كورسەتەدى. اۋدان سپورتشىلارىنا جارىسقا بارۋىن قامتاماسىز ەتىپ وتىر. قوردىڭ اشىلعانىنا 1 جىلعا جۋىق ۋاقىت بولىپ قالسا دا، ءبىرشاما ءىس-شارالاردى اتقارعان. اۋىل جاستارىنىڭ اراسىندا سپورتتان سايىستار وتكىزىپ، كارانتين كەزىندە مۇقتاج جاندارعا كومەكتەستى. ودان بولەك، مەكتەپ وقۋشىلارىمەن كەزدەسۋ وتكىزىپ، 100 تاڭداۋلى كىتاپتى سىيعا تارتتى. كاسىپكەردىڭ ايتۋىنشا، قوردى اشۋعا جاقسىلىق ۇشكەمپىروۆتىڭ سەپتىگى بولعان.
«100 dos Shubar» قوعامدىق قورىنىڭ اشىلۋىنا جاقسىلىق ۇشكەمپىروۆ سەبەپ بولدى. كوزى ءتىرى كەزىندە «اۋىل – ەل بەسىگى» جوباسى كەزىندە تانىسىپ، بىرنەشە رەت كەزدەسكەن ەدىم. كەيىن داستارحانداس بولىپ، ونەگەلى سوزدەرىن ەستىدىم. ول قازاقتىڭ ماڭدايىنا بىتكەن پالۋانى عانا ەمەس، ءوز اۋىلىنا 200 بالاعا ارنالعان سپورت مەكتەبىن سالىپ، 50-دەن استام جاس وتباسىعا ءۇي سىيلاعان كاسىپكەر ەدى. ول كىسى قازاقستاندا 5000 اۋىل بولسا، ول 5000 اۋىلدان شىققان كاسىپكەر اۋىلدارىن كوركەيتسە دەپ ارماندايتىن ەدى. مىنە، سول ءسوزى سانامدا قالعان. سوندىقتان تۋعان جەرىمدى كوركەيتۋ، اۋىلىمنىڭ جاستارىن قولداۋ مەنىڭ باستى ماقساتىم. ماقساتىما ءبىر قادام جاقىنداپ كەلەمىن. ول ءۇشىن ءاردايىم قىزمەت ەتە بەرمەكپىن»، - دەيدى بيزنەسمەن.
كاسىپكەر بولاشاق كاسىپ باستايمىن دەۋشىلەرگە اقىل-كەڭەسىن دە ايتا كەتتى.
«جاڭا باستاما ءۇشىن جاڭا نارسەنى كورۋگە ۇمتىلۋ كەرەك. ءوزىڭ قۇرىپ العان كىشكەنە شەكارادان شىعىپ كورۋ قاجەت. الەمدى، جاڭا جەرلەردى ارالاۋ كەرەك. ەڭ بولماعاندا جاڭا كىتاپ وقۋ كەرەك. ويتكەنى، جاڭاشىلدىق جاڭا باستاماعا يتەرمەلەيدى. قانشا اۋىلدىڭ بالاسى بولساڭىز دا، ءبىلىمدى بولساڭىز بارىنەن وزاسىز. ودان كەيىن، سۇيىكتى ىسىڭىزگە بار ۋاقىتىڭىز بەن ەنەرگياڭىزدى جۇمساڭىز. سوندا عانا ءبارى ناتيجەلى بولادى»، دەپ بولاشاق كاسىپكەرلەرگە اقىلىمەن ءبولىستى.
قازىر التىنبەك جۇبايىمەن ەكى ۇل، ەكى قىز تاربيەلەپ وتىر. وتباسىندا سىيلى اكە بالالارىنىڭ ءبىلىمدى بولۋىنا دا كوپ كوڭىلىن بولەدى.
«ەڭ باستىسى – وتباسى. وتباسىنىڭ قولداۋى قاشاندا دەمەۋ بولادى. مەنىڭ بيىكتەرگە كوتەرىلۋىمنىڭ بارلىعى وتباسىمنىڭ ارقاسى. ولاردىڭ قولداۋى، ولاردىڭ ءبىلىمدى بولۋى مەن ءۇشىن ماڭىزدى»، دەپ ءسوزىن قورىتىندىلادى كاسىپكەر.
دانا نۇرمۇحانبەت
«ادىرنا» ۇلتتىق پورتالى
