«اباي تۋرالى ەستەلىكتەر» كىتابى بەس مىڭ دانامەن جارىق كوردى

 Adebiportal.kz پورتالى جاقسى جاڭالىق تۋرالى جازدى. جاقىندا ابايدىڭ «جيدەباي-ءبورىلى» مەملەكەتتىك قورىق-مۋزەيىنىڭ اسىل قورىندا ساقتالعان قولجازبالاردىڭ نەگىزىندە «اباي تۋرالى ەستەلىكتەر» كىتابى «ادەبيەتتىڭ الەۋمەتتىك ماڭىزدى تۇرلەرىن ساتىپ الۋ، باسىپ شىعارۋ جانە تاراتۋ» باعدارلاماسى اياسىندا 5000 تارالىممەن جارىق كوردى. كىتاپتىڭ جالپى رەداكتسياسىن باسقارعان – جازۋشى، ابايدىڭ «جيدەباي-ءبورىلى» قورىق مۋزەيىنىڭ ديرەكتورى بولات جۇنىسبەكوۆ. وقىرماندار بۇل كىتاپتان قازاقستان رەسپۋبليكاسىنىڭ تۇڭعىش پرەزيدەنتى ن.نازارباەۆتىڭ حاكىم ابايدىڭ يۋنەسكو كولەمىندەگى 150 جىلدىق مەرەيتويى قارساڭىنداعى «اباي تۋرالى ءسوز» بايانداماسىمەن، ا.قۇنانبايۇلىنىڭ نەمەرە ءىنىسى ءارحام كاكىتايۇلى مەن بالاسى تۋراعۇل ابايۇلىنىڭ، زامانداسى ءارى شاكىرتى، كورنەكتى اقىن كوكباي جاناتايۇلىنىڭ، ابايتانۋشى، شەجىرەشى نيازبەك الداجارۇلىنىڭ ەستەلىكتەرىمەن تانىسا الادى. دالا دانىشپانى، كەمەڭگەر تۇلعا ابايعا قاتىستى ءار دەرەك، ءاربىر تاريحي جازبا باعا جەتپەس قۇندىلىق. سول قۇندىلىقتاردىڭ مۇراعات تۇكپىرىندە ەلەۋسىز قالىپ قويماي، ۋاقىتپەن بىرگە جاساپ، كەزىندەگى ءتۇرلى وقيعالاردان سىر شەرتىپ، بۇگىنگى قاۋىمدى كەشەگى كۇندەردىڭ سىر-سيپاتىنا قانىقتىرىپ وتىرعانى ابزال. ابايدى تانۋ ارقىلى ءومىر قۇبىلىستارىن، قوعام دامۋىنىڭ قۇپيالارىنا دا تەرەڭىرەك بويلايتىنىمىز انىق. وسى تۇرعىدان كەلگەندە «اباي تۋرالى ەستەلىكتەر» جيناعى تەك ابايتانۋشىلار مەن وقىتۋشى، ستۋدەنتتەردىڭ عانا ەمەس، ويلى وقىرماننىڭ سۇرانىسىن قاناعاتتاندىراتىن قازىنا.