ادىلەت مينيسترلىگىنە جىل باسىنان بەرى 7 باستاماشىل توپتان پارتيا قۇرۋ نيەتى تۋرالى حابارلاما ءتۇسىپ، Halyq Uni اقپارات اگەنتتىگى تىركەۋگە حابارلاما جىبەرگەن ساياسي پارتيالاردىڭ سانى مەن ولاردى تىركەۋ پروتسەدۋراسىنىڭ قاي كەزەڭدە تۇرعانىن ءبىلۋ ءۇشىن ادىلەت مينيسترلىگىنە ساۋال جولداعان بولاتىن، دەپ حابارلايدى "ادىرنا" ۇلتتىق پورتالى.
2022 جىلى شىلدەدەگى جاعداي بويىنشا، بيزنەس-سايكەستەندىرۋ نومىرلەرىنىڭ ۇلتتىق ءتىزىلىمىنىڭ مالىمەتىنشە، 6 ساياسي پارتيا تىركەلگەن. ولار «Amanat» پارتياسى، «اق جول» قازاقستاننىڭ دەموكراتيالىق پارتياسى، قازاقستان حالىق پارتياسى، «اۋىل» حالىقتىق-دەموكراتيالىق پاتريوتتىق پارتياسى، «ADAL» ساياسي پارتياسى، «جالپىۇلتتىق سوتسيال-دەموكراتيالىق پارتيسى».
سونداي-اق، جىل باسىنان بەرى مينيسترلىككە 7 باستاماشىل توپتان پارتيا قۇرۋ نيەتى تۋرالى حابارلامالار تۇسكەن. اتاپ ايتقاندا، «پارتيا ەl تiregi»، قازاقستاننىڭ جاسىل پارتياسى «بايتاق»، «Namys»، «العا قازاقستان»، «جاناشىر»، «قازاقستاننىڭ حالىق كونگرەسى» جانە «Bizdin Tandau» پارتيالارى.
مينيسترلىك «Namys» ساياسي پارتياسىنان وزگە قالعان التى پارتيانىڭ حابارلاماسى راستاۋسىز كەرى قايتارىلعانىن مالىمدەدى.
تىركەلمەگەن «Namys» ساياسي پارتياسىنىڭ ۇيىمداستىرۋ كوميتەتىنىڭ ۋاكىلەتتى تۇلعاسىنا تىركەۋشى ورگان راستاما قۇجاتىن بەردى. قالعان ۇيىمداستىرۋ كوميتەتتەرىنە زاڭنىڭ 6-بابى 1-تارماعىنىڭ، 8-بابىنىڭ، 10-بابى 6-تارماعىنىڭ تالاپتارىنا سايكەس ەسكەرتۋلەردىڭ انىقتالۋىنا بايلانىستى حابارلامالارى راستاۋسىز قايتارىلادى، - دەلىنگەن رەسمي جاۋاپتا.
«العا قازاقستان» پارتياسىنىڭ جەتەكشىسى ساياساتكەر جاسارال قۋانىشالين باستاعان توپ قۇجاتى تولىق بولماي، ءوتىنىشىن وتكىزە الماعانىن بۇدان بۇرىن مالىمدەگەن بولاتىن.
ال «Namys» ساياسي پارتياسىنىڭ جەتەكشىسى سانجار بوقاەۆ 19 شىلدە ءباسپاسوز ءماسليحاتىن وتكىزەتىنىن، وندا پارتيا قۇرۋ جولىنداعى كەدەرگىلەر مەن زاڭعا ەنگىزىلۋى قاجەت وزگەرىستەر تۋرالى ايتىلاتىنىن حابارلادى.
«ەرتەڭ وسى ماسەلە بويىنشا «Namys» پارتياسىنىڭ ءباسپاسوز ءماسليحاتىن وتكىزبەكپىز. ەڭ باستىسى تىركەلۋ بارىسىنداعى نەگىزگى ماسەلەلەر، زاڭعا قانداي وزگەرىستەر ەنگىزۋى ءتيىس دەگەن سۇراقتار كوتەرىلەدى»، - دەدى ول Halyq Uni تىلشىسىنە.
ۆەدومستۆو تاراتقان مالىمەتىنشە، زاڭنىڭ 6-بابىنا سايكەس ساياسي پارتيا سانى مىڭ ادامنان كەم بولماۋى ءتيىس. سونىمەن بىرگە، ساياسي پارتيانىڭ قۇرىلتاي سەزىن شاقىراتىن جانە وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ ۇشتەن ەكىسىنىڭ اتىنان وكىلدىك ەتەتىن ازاماتتار توبىنىڭ باستاماسى بويىنشا قۇرىلادى. ازاماتتار ساياسي پارتيانىڭ قۇرىلتاي سەزىنە جەكە ءوزى قاتىسادى.
ۇيىمداستىرۋ كوميتەتى تىركەۋشى ورگانعا ءتيىستى قۇجاتتاردى قوسا بەرە وتىرىپ، تىركەۋشى ورگان بەلگىلەگەن نىسان بويىنشا ساياسي پارتيا قۇرۋ نيەتى تۋرالى حابارلاما بەرەدى. تىركەۋشى ورگان حابارلامانى جانە وسى باپتىڭ 3-تارماعىندا كورسەتىلگەن وزگە دە قۇجاتتاردى العان كۇنى ۇيىمداستىرۋ كوميتەتىنىڭ ۋاكىلەتتى ادامىنا ولاردىڭ ۇسىنىلعانىن راستايتىن قۇجاتتى بەرەدى.
"ادىرنا" ۇلتتىق پورتالى
