14 قاڭتاردان باستاپ قازاقستاندىق ء«ابىل» ءفيلمى فرانتسيا كينوتەاترلارىنا پروكاتقا شىعادى. بۇل تۋرالى تۋىندىنىڭ رەجيسسەرى ەلزات ەسكەندىر مالىمدەدى، دەپ حابارلايدى «ادىرنا» ءتىلشىسى.
ايتۋىنشا، ءفيلمدى فرانتسيا اۋماعىندا كورسەتۋدى فرانتسيالىق Damned Films كومپانياسى قازاقستاندىق ش.ايمانوۆ اتىنداعى قازاقفيلم كينوستۋدياسىمەن جانە ءفيلمنىڭ ناسيحات جۇمىستارىمەن اينالىسقان Tanaris كينوكومپانياسىمەن كەلىسىمشارت جاساسا وتىرىپ جۇزەگە اسىرۋدا.
ء«فيلمنىڭ كەڭ اۋقىمدا فرانتسيا كورەرمەندەرىنە جەتەتىنىنە قۋانىشتىمىز. جانە ءفيلمنىڭ حالىقارالىق پروديۋسەرى يۋليا كيمگە زور العىس بىلدىرەمىز»،-دەدى ول.
بۇعان دەيىن كارتينا فرانتسيادا وتكەن 31-Vesoul حالىقارالىق ازيا كينوفەستيۆالىنەن ءۇش بىردەي ماراپاتقا يە بولعان ەدى.
ايتا كەتەيىك، ء«ابىل» ءفيلمى — كەڭەس وداعى قۇلاپ، كولحوز-سوۆحوز تاراپ، مال-مۇلىك بولىسكە ءتۇسىپ، ەلدە پريۆاتيزاتسيا ورىن العان كەزەڭدەگى قياناتقا ۇشىراعان قاراپايىم ادامدار مەن قاراۋسىز قالعان قازاق اۋىلىنداعى بەيبەرەكەتسىزدىكتى سۋرەتتەيدى. سول ارقىلى كينوتۋىندى تاۋەلسىزدىك باسىنداعى كۇردەلى ۋاقىت اياسىنداعى قازاق حالقىنىڭ رۋحاني كەيپىنە، پسيحولوگيالىق كۇيىنە الەۋمەتتىك تالداۋ جاسايدى. فيلمدە كەڭەستىك جۇيە كەزىندەگى ادام ءومىرىنىڭ قۇنسىزدىعى، قازاق حالقىنىڭ باستان كەشكەن جاعدايى، تۇرمىس قالپى، ءوز ەلىندە، ءوز جەرىندە ديسكريميناتسياعا تۇسكەندىگى، سوتسياليزمنەن كاپيتاليزمگە اۋىسۋ تۇسىنداعى ەكىۇداي سەزىم، سونىمەن قاتار جەمقورلىقتىڭ پايدا بولۋى جايلى دا وي قوزعايدى.
