جەكسەنبى كۇنى الماتى جەلكەسىندەگى ەڭ بيىك شىڭعا شىعىپ كەلدىك. كانىگى الپينيست ەرشات ايازباەۆ دوستىڭ جۇرىسىنە اناۋ-مىناۋ جىگىتىڭ شىداس بەرمەس بىلەم. قامشى سالدىرماي ۇزەڭگىلەسە ءجۇرىپ وتىردىم. تالعار اسۋىنان اتتانىپ، ءتورت ساعاتقا تولتىرماي شىڭ باسىنا جەتىپ تىزگىن تارتتىق. ءاۋ باستا، تاۋعا قۇمار باستالعان شاقتا ەتەگىنە بارىپ ءبىر قونىپ، ەرتەسىنە جەتۋشى ەدىك…
تەڭىز دەڭگەيىنەن 4376 مەتر بيىكتىكتە تۇرعان بۇل شىڭ الماتىنىڭ كەز كەلگەن تۇسىنان مەن مۇندالاپ تۇرادى. 1935 جىلعا دەيىن كىشى الماتى شىڭى دەپ اتالعان. 1935 جىلدان 1997 جىلعا دەيىن كومسومول اتاۋىندا بولدى. ودان كەيىن نۇرسۇلتان اتالدى. 2023 جىلى الماتى شىڭى بولىپ وزگەردى. بىراق بۇل اتاۋ قازاقستان گەوگرافيالىق اتاۋلارىنىڭ ءتىزىلىمى بازاسىندا رەسمي جاريالانعان جوق. دەمەك، قازاقستان الپينيزم فەدەراتسياسى اياسىندا عانا اتالىپ جۇرگەن سىڭايلى.
شىڭ باسىنداعى “الماتى شىڭى Almaty peak” دەپ جازىلعان تاقتانى ەكى جىل بۇرىن وسى ەرشات ورناتقان.
سالىستىرعاندا الماتى شىڭى ۇلكەن الماتى كولىنىڭ يىق تۇسىنداعى ۇلكەن الماتى شىڭىنان 696 مەترگە بيىك. قازاق تاۋدى، شىڭدى اتاعاندا ونىڭ ۇلكەن نەمەسە بيىكتىگىنە بايلانىستى ات قويمايدى. ماڭايىنداعى وزەن-سۋعا قاراتا اتايدى. دەمەك، ۇلكەن الماتى شىڭىن ۇلكەن الماتى وزەنىنىڭ باستاۋ اڭعارىنا، ۇلكەن الماتى كولىنە تەلي اتاسا كەرەك…
شىڭ باسىندا تۇرىپ مىناداي وي كەلدى: ءالى دە رەسمي تۇردە نۇرسۇلتان اتالىپ تۇرعان بۇل شىڭدى قاڭتار شىڭى دەپ اتاساق.
قاڭتار كوتەرىلىسىنىڭ قۇرباندارىنا قۇرمەتىمىز بولسىن. الماتىدان سايلانعان بەلسەندى دەپۋتاتتارىمىز ەرمۇرات باپي، باقىتجان بازاربەك مىرزالار بۇل باستامانى ءماجىلىس مىنبەرىنەن كوتەرسە يگى.
