ەلىمىزدە شاي ونىمدەرىنەن قاۋىپتى قوسپالار انىقتالدى. وسىعان بايلانىستى قارا شايدىڭ بىرقاتار ماركاسىن اكەلۋگە جانە ساتۋعا تىيىم سالىندى. بۇل تۋرالى دسم سانيتارلىق-ەپيدەميولوگيالىق باقىلاۋ كوميتەتى جازدى، دەپ حابارلايدى «ادىرنا» ءتىلشىسى.
ءتيىستى قاۋلىعا 5 قاڭتاردا باس مەملەكەتتىك سانيتاريالىق دارىگەر قول قويعان. شەشىم باقىلاۋ ساتىپ الۋلارى مەن سانيتاريالىق-ەپيدەميولوگيالىق ساراپتاما قورىتىندىلارىنىڭ نەگىزىندە قابىلدانعان. تەكسەرۋ بارىسىندا قولدانىستاعى نورماتيۆتەرگە سايكەس پايدالانۋعا تىيىم سالىنعان تاعامدىق بوياعىشتارى بار قارا شايدى ءوندىرۋ جانە ساتۋ فاكتىلەرى انىقتالعان.
«ساراپتاما جۇرگىزۋ بارىسىندا قۇرامىندا تاعامدىق بوياعىشتار (سارى «كۇن باتۋى» (E110), تارترازين (E102), پونسو 4R (E124)) بار قارا شايدىڭ ءوندىرىلىپ، ساتىلۋ فاكتىلەرى انىقتالدى، ولاردى شايدا قولدانۋعا رۇقسات ەتىلمەيدى»،-دەلىنگەن حابارلامادا.
بۇدان بولەك، حالىقتىڭ سانيتاريالىق-ەپيدەميولوگيالىق قاۋىپسىزدىگى سالاسىنداعى تەرگەۋلەر بارىسىندا شاي قاپتامالارىندا شاي ءوندىرىسى مەن قاپتالۋىندا راستالماعان مەكەنجايلاردىڭ كورسەتىلگەنى انىقتالعان، بۇل قىزمەتتى جۇزەگە اسىرۋعا رۇقسات بەرۋ قۇجاتتارىنىڭ جوقتىعىن كورسەتەدى.
انىقتالعان زاڭبۇزۋشىلىقتارعا بايلانىستى كەلەسى قارا شايلاردى ەلگە اكەلۋگە جانە ساتۋعا تىيىم سالىندى:
- “اپامنىڭ ءشايى Premium Gold”، Al-Hayat Golg, “بالقيا Premium Gold” – ءوندىرۋشى: جشس Orda Trade Astana (الماتى وبلىسى);
- Sultan Suleyman, Pakistan tea – ءوندىرۋشى: جشس Real Trade Astana (استانا);
- “بالقيا Premium Gold” – ءوندىرۋشى: جشس “ال-حاديا” (الماتى);
- Aje Onim – ءوندىرۋشى: جك “وردا چاي” (الماتى) توو “كالتسي” تاپسىرىسى بويىنشا;
- Al-Hayat Golg – ءوندىرۋشى: Empire KENIY E.P.Z. Limited (الماتى وبلىسى);
- Al-Jannat Premium – ءوندىرۋشى: جك Ferdaus (الماتى);
- Alfarah – وراماسىندا ءوندىرۋشى كورسەتىلمەگەن.
سانيتاريالىق قىزمەتتەر قازاقستاندىقتاردى ءونىمنىڭ ماركيروۆكاسىنا جانە قايدان شىعارىلعانى تۋرالى اقپاراتقا نازار اۋدارۋعا شاقىرادى.
