“30 جىلدا 30 ءۇي دە سالىنعان جوق!”: جەزقازعان قالاسىنىڭ تۇرعىندارى اپاتتى جاعدايدا ءومىر سۇرۋدە

3205
Adyrna.kz Telegram
فوتو:  ۆيدەودان الىندى
فوتو: ۆيدەودان الىندى

جەزقازعان قالاسىنىڭ ورتالىعىندا اپاتتى ۇيلەر كوپ. جول ماسەلەسى دە ءماز ەمەس. ورتالىق كوشەلەرىندە ايۋدىڭ اپانىنداي شۇڭقىرلاردىڭ جاتۋى قالىپتى جاعداي. بۇل تۋرالى سۇراۋى بار يۋتۋب ارناسى دەرەكتى فيلم ءتۇسىردى، دەپ حابارلايدى “ادىرنا” ۇلتتىق پورتالى.
فيلمدەگى مالىمەتتەرگە سۇيەنسەك، 1997 جىلى جەزقازعان وبلىسىنىڭ تاراتىلۋىنا ءالى كۇنگە دەيىن حالىق نارازى.

«ءبىزدىڭ حالىقتى تۇنشىقتىرىپ تاستاعان. جەزقازعاندى تاراتۋ تۋرالى جينالىس وتە زاردابى مول جينالىس بولدى. ءبىزدىڭ اقساقالدار ەكى قولىن كوتەرىپ، قولداپ الا جونەلدى. سول جينالىس مەنىڭ جادىمدا قالىپتى. جارتى ساعاتقا دا سوزىلعان جوق. بۇكىل وبلىستى قولدان بەردى دە جىبەردى. ءبىر ادام قارسى بولعان جوق. ءتىپتى، قولداپ سويلەگەن اقساقالدارىمىز بولدى. مەن ول جينالىستا بولعان جوقپىن. بىراق حالىق ىشتەي قارسى بولعان جوق. كەيىن سىرتتاي كۇنكىلدەگەندەر بولدى»، - دەيدى قازاقستاننىڭ قۇرمەتتى ءجۋرناليستى بازارباي الەۋحانۇلى.

ءجۋرناليستىڭ ايتۋىنشا، جەزقازعاندى تاراتقاننان كەيىن قالادا ەشقانداي دامۋ بولمادى.

«جەزقازعان ۇكىمەتتىڭ تاراپىنان مونوقالالار دەگەن باعدارلاماعا ىلىككەن قالا. وندا دا تۇك ىستەلگەن جوق. سول باياعى جارتاس، ءبىر جارتاس. ءالى دە تازا سۋ ءىشىپ وتىرعان جوق، دۇرىس سۋ ءىشىپ وتىرعان جوق. اپات دەگەن سۇمدىق. ەكولوگيانى بۇزىپ تۇرعان قازاقمىستىڭ ءوندىرىس ورىندارى. بۇعان ۇلكەن اقشا ءبولىنىپ جاتقان جوق. شترافپەن عانا قۇتىلىپ وتىر. ال شتراف كورپوراتسيا ءۇشىن بولماشى نارسە»، - دەيدى ول.

ال جەزقازعان قالاسىنىڭ تۇرعىندارى اپاتتى ۇيلەر مەن جۇمىسسىزدىقتان شارشاعان.

«30 جىل بويى 30 ءۇي سالىنعان جوق. كەڭەس وداعى كەزىندە شاعىناۋداندار عانا كوتەرىلگەن. 30 جىلدا كورپوراتسيا ءبىر ءۇي سالدى دەگەندى ەستىگەن جوقپىن. تەك قالالىق اكىمدىكتەن سوڭعى جىلدارى پايدا بولا باستادى. ەلگە جۇمىس ورنىن اشۋ كەرەك قوي. تەك شاحتەر مەن مەتاللۋرگ قانا جۇمىس ىستەۋ كەرەك پە؟ باسقا جۇمىس بولۋى كەرەك قوي. بىزگە جۇمىس كەرەك. قانشاما جاستار جۇمىسسىز ءجۇر؟!»، دەپ كۇيىندى.

پىكىرلەر