جەتىنشى قاباتتان قۇلاعالى تۇرعان بالانى قۇتقارىپ قالعان جاسوسپىرىمگە 3 بولمەلى پاتەر بەرىلدى. بۇل تۋرالى قازاقپارات تىلشىسىنە باتىر جىگىت ەسداۋلەت داۋىتبەكوۆتىڭ ءوزى ءمالىم ەتتى، دەپ حابارلايدى «ادىرنا» ءتىلشىسى.
«ءبىزدى بۇگىن G-Park كومپانياسى شاقىردى. 3 بولمەلى پاتەر بەردى. ەرتەڭنەن باستاپ قۇجاتتاردى راسىمدەيمىز دەدى. ال، ءبىزدىڭ ءدال قازىرگى تۇرىپ جاتقان ءۇيىمىزدى يپوتەكاعا العانبىز»، - دەدى ەسداۋلەت داۋىتبەكوۆ.
سونىمەن قاتار، ەسداۋلەت وقيعانىڭ ءمان-جايىن ءوزى تولىق بايانداپ بەردى.
«مەن اۋلادا فۋتبول ويناپ جۇرگەنمىن. كورشىلەردىڭ بارلىعى جينالا باستادى. مەن دە بارىپ ءمان-جايدى بىلمەك بولدىم. سويتسەم، كىشكەنتاي بالا تەرەزەنىڭ الدىندا تۇر ەكەن. تەرەزەگە ماسكەتتىك تور تاعىلعان. ول ۇزىلۋگە ءسال قالىپتى. كەيىن مەن 7-قاباتقا كوتەرىلىپ، بالا تۇرعان ءۇيدىڭ ەسىگىن قاقتىم. ۇيدە ۇلكەندەردەن ەشكىم بولمادى. سوسىن پاتەر يەسەنىڭ رۇقساتىمەن كورشى ءۇيدىڭ بالكونىنان شىعىپ، بالانى امان ساقتاپ قالدىم دەپ ايتا الامىن. ءبۇلدىرشىن شامامەن 3 جاستا. ۇيگە كىرگەندە پاتەردە تاعى دا ءۇش بالا بار ەكەن. اناسى دۇكەنگە كەتكەن. مەن بالالاردىڭ اناسى كەلگەنگە دەيىن بۇلدىرشىندەرمەن بىرگە بولدىم. كورشىلەر پوليتسيا جانە توتەنشە جاعدايلار قىزمەتكەرلەرىن شاقىردى. ولار ءبىر ساعاتتان كەيىن عانا كەلدى. ال، بالا ءولىم مەن ءومىر اراسىندا تۇر عوي. سول ءبىر ساعاتتىڭ ىشىندە نە بولاتىنىن ءبىر قۇداي بىلەدى. سوندىقتان، وعان دەيىن قاراپ تۇرا المادىم»، - دەدى ول.
باتىر جىگىت بۇل ارەكەتىن ماراپات الۋ ءۇشىن جاساماعانىن جەتكىزدى. دەگەنمەن، ونى ەلەپ-ەسكەرگەن قالا تۇرعىندارى مەن لايىقتى قۇرمەت كورسەتىپ جاتقان جاندارعا العىسىن ءبىلدىردى.
