Jetinshi qabattan qulaǵaly turǵan balany qutqaryp qalǵan jasóspirimge 3 bólmeli páter berildi. Bul týraly QazAqparat tilshisine batyr jigit Esdáýlet Dáýitbekovtiń ózi málim etti, dep habarlaıdy «Adyrna» tilshisi.
«Bizdi búgin G-Park kompanııasy shaqyrdy. 3 bólmeli páter berdi. Erteńnen bastap qujattardy rásimdeımiz dedi. Al, bizdiń dál qazirgi turyp jatqan úıimizdi ıpotekaǵa alǵanbyz», - dedi Esdáýlet Dáýitbekov.
Sonymen qatar, Esdáýlet oqıǵanyń mán-jaıyn ózi tolyq baıandap berdi.
«Men aýlada fýtbol oınap júrgenmin. Kórshilerdiń barlyǵy jınala bastady. Men de baryp mán-jaıdy bilmek boldym. Sóıtsem, kishkentaı bala terezeniń aldynda tur eken. Terezege maskettik tor taǵylǵan. Ol úzilýge sál qalypty. Keıin men 7-qabatqa kóterilip, bala turǵan úıdiń esigin qaqtym. Úıde úlkenderden eshkim bolmady. Sosyn páter ıeseniń ruqsatymen kórshi úıdiń balkonynan shyǵyp, balany aman saqtap qaldym dep aıta alamyn. Búldirshin shamamen 3 jasta. Úıge kirgende páterde taǵy da úsh bala bar eken. Anasy dúkenge ketken. Men balalardyń anasy kelgenge deıin búldirshindermen birge boldym. Kórshiler polıııa jáne tótenshe jaǵdaılar qyzmetkerlerin shaqyrdy. Olar bir saǵattan keıin ǵana keldi. Al, bala ólim men ómir arasynda tur ǵoı. Sol bir saǵattyń ishinde ne bolatynyn bir Qudaı biledi. Sondyqtan, oǵan deıin qarap tura almadym», - dedi ol.
Batyr jigit bul áreketin marapat alý úshin jasamaǵanyn jetkizdi. Degenmen, ony elep-eskergen qala turǵyndary men laıyqty qurmet kórsetip jatqan jandarǵa alǵysyn bildirdi.
