مەملەكەت باسشىسىنىڭ اۆتوموبيل جولدارىنىڭ ساپاسىن جاقسارتۋ جونىندەگى تاپسىرماسىنا سايكەس قر يندۋستريا جانە ينفراقۇرىلىمدىق دامۋ مينيسترلىگى جول سالاسىنداعى باقىلاۋدى كۇشەيتۋگە، سونداي-اق بەيىندى نورماتيۆتىك اكتىلەردى وزەكتەندىرۋگە باعىتتالعان بىرقاتار جۇيەلى شارالار دايىندادى.
اتاپ ايتقاندا، كولىك ماسەلەلەرى بويىنشا زاڭ جوباسى ازىرلەندى، ول «جول اكتيۆتەرى ۇلتتىق ساپا ورتالىعى" رمك ارقىلى ەلدى مەكەندەردەگى جولداردى جوندەۋ ساپاسىنا مىندەتتى ساراپتاما ەنگىزۋدى كوزدەيدى. ول نورماتيۆتەرگە سايكەستىككە، سونداي-اق كەپىلدىك كەزەڭىندە اقاۋلاردىڭ پايدا بولۋى ءۇشىن تەحنيكالىق قاداعالاۋ مەن جوبالاۋ ۇيىمدارىنىڭ ورتاق جاۋاپكەرشىلىگىن بەرەتىن بولادى.
ايتا كەتۋ كەرەك، بۇگىنگى تاڭدا جولداردى پايدالانۋعا بەرگەننەن كەيىن تەحنيكالىق قاداعالاۋ مەن جوبالاۋ ۇيىمدارى ساپاسىز جوبالىق شەشىمدەر مەن اقاۋلار انىقتالعان جاعدايدا جاۋاپ بەرمەيدى.
قازىرگى ۋاقىتتا زاڭ جوباسى قر پارلامەنتى ءماجىلىسىنىڭ قاراۋىندا جاتىر.
بۇدان باسقا، مينيسترلىك اۆتوجول سالاسىنداعى نورماتيۆتەردىڭ ءوزىن دە وزەكتەندىرەدى، ولاردىڭ سانى 1200-گە جۋىق. ولار جۇمىستاردى جۇرگىزۋدى ۇيىمداستىرۋدى، ساپانى، مازمۇندى جانە ت.ب. باقىلاۋ ماسەلەلەرىن رەتتەيدى، وسى قۇجاتتار بويىنشا حالىقارالىق تاجىريبە مەن تەحنولوگيالاردى، سونداي-اق قازىرگى زامانعى ماتەريالداردى قولدانۋدى ەسكەرە وتىرىپ، ولاردى قايتا وڭدەۋ بويىنشا جۇمىس جۇرگىزىلەدى.
قر يدم قوسىمشا ىنتالاندىرۋ شاراسى رەتىندە جول ساپاسى بويىنشا وبلىس اكىمدىكتەرىنىڭ رەيتينگىن انىقتاۋ ادىستەمەسى ازىرلەندى. ونى جىل سوڭىنا دەيىن بەكىتۋ جوسپارلانۋدا.
ەستەرىڭىزگە سالا كەتەيىك، بۇگىنگى تاڭدا قازاقستاندا جالپى قولدانىستاعى اۆتوموبيل جولدارىنىڭ ۇزىندىعى 157 مىڭ شاقىرىمدى قۇرايدى. ونىڭ ىشىندە 25 مىڭ شاقىرىم رەسپۋبليكالىق ماڭىزى بار جول، 71 مىڭ شاقىرىم جەرگىلىكتى ماڭىزى بار جول جانە 61 مىڭ شاقىرىم ەلدى مەكەندەر كوشەلەرىنىڭ جولى.
“ادىرنا” ۇلتتىق پورتالى
