بىلتىر عانا 10 جىلعا سوتتالعان كەنتاۋ قالاسىنىڭ بۇرىنعى اكىمى داۋرەن ماحاجانوۆ بيىل تۇرمەدەن بوساتىلدى، دەپ حابارلايدى "ادىرنا" ءتىلشىسى Otyrar.kz-كە سىلتەمە جاساپ.
الماتى قالاسى، الماتى وبلىسى جانە جەتىسۋ وبلىسى بويىنشا قىلمىستىق اتقارۋ جۇيەسى دەپارتامەنتىنىڭ مالىمەتىنشە، "پارا الدى" دەگەن كۇدىككە ىلىنگەن كەنتاۋلىق اكىمنىڭ باس بوستاندىعىنان ايىرۋ جازاسى ايىپپۇل تولەۋگە اۋىستىرىلعان.
2022 جىلدىڭ شىلدەسىندە سوت ماحاجانوۆتى 50 ميلليون تەڭگە پارا العانى ءۇشىن 10 جىلعا باس بوستاندىعىنان ايىرعان بولاتىن. دەگەنمەن ءبىر جىلدان كەيىن جوعارعى سوتتا باس پروكۋراتۋرانىڭ نارازىلىعىمەن بۇرىنعى شەنەۋنىكتىڭ جازاسى الاياقتىق رەتىندە قايتا قارالعان.
دەرەكتەرگە سۇيەنسەك، بۇرىنعى اكىم جابىرلەنۋشىدەن اقشانى پارا رەتىندە الماعان، جابىرلەنۋشىنى الداپ سوققان.
10 جىلعا ۇكىم شىققان داۋرەن ماحاجانوۆتىڭ "پارا الۋعا وقتالۋ" بابى "الاياقتىققا وقتالۋ" بولىپ قايتا قارالىپ، اكىمنىڭ مەرزىمى بەس جىلعا دەيىن قىسقارتىلعان.
ال قىركۇيەكتە ماحاجانوۆ كولونيادان بوساتىلعانى ايتىلدى. ەكس-شەنەۋنىك 1 ميلليون 988 مىڭ تەڭگە ايىپپۇل تولەپ، بوستاندىققا شىققان.
"2023 جىلدىڭ 8 قىركۇيەگىندە قاپشاعاي قالالىق سوتىنىڭ باس بوستاندىعىنان ايىرۋ جازاسىن ايىپپۇلمەن اۋىستىرۋ تۋرالى قاۋلىسى نەگىزىندە سوتتالۋشى د.ماحاجانوۆ زارەچنىي كەنتىندەگى №57 مەكەمەدەن شىعارىلدى", – دەپ حابارلادى الماتى وبلىسى بويىنشا قىلمىستىق-اتقارۋ جۇيەسى وكىلدەرى.
