باتىس قازاقستان وبلىسىنىڭ اكىمى وڭىردەگى جاعدايدى باياندادى، دەپ حابارلايدى "ادىرنا" ءتىلشىسى Tengrinews.kz-كە سىلتەپ.
ايماق باسشىسى وبلىستا سۋ تاسقىنى جاعدايىنىڭ شيەلەنىسكەنىن ايتىپ، جايىق وزەنىندەگى سۋ دەڭگەيى 7 مەترگە جەتىپ، شەكتى دەڭگەيگە جاقىنداعانىن ايتتى.
وبلىستاعى اقجايىق، ءبورلى، بايتەرەك، تەرەكتى اۋداندارىندا، ورال قالاسىنىڭ جايىق وزەنىنىڭ بويىندا ورنالاسقان اۋداندارىندا 94 ەلدى مەكەندى سۋ باسۋ قاۋپى ءتونىپ تۇر. وبلىس اكىمى:
«بارلىق رەسۋرستاردى جۇمىلدىردىق، جايىق وزەنىنىڭ جاعالاۋىنداعى اسا قاۋىپتى ۋچاسكەلەردە بوگەتتەر سالىنۋدا.جاعالاۋدى نىعايتۋ جۇمىستارىنا 200 بىرلىك تەحنيكا جۇمىلدىرىلىپ، 1000-عا جۋىق ادام جۇمىلدىرىلعان»، - دەدى ناريمان تورەعاليەۆ.
ناريمان تورەعاليەۆ مەملەكەت باسشىسى سۋ تاسقىنى جاعدايىنا بايلانىستى قازاقستان حالقىنا جولداۋىندا تابيعي اپاتتان زارداپ شەككەن بىردە-ءبىر تۇرعىننىڭ كومەكسىز قالمايتىنىن اتاپ وتكەنىن ەسكە سالدى.
«زارداپ شەككەندەرگە وبلىس جۇرتشىلىعى دا ۇلكەن قولداۋ كورسەتۋدە. وبلىستىڭ كاسىپكەرلەرى، قوعامدىق بىرلەستىكتەر، ۆولونتەرلار جانە قاراپايىم وبلىس تۇرعىندارى كومەكتەسۋدە، بۇل ءۇشىن ولارعا ۇلكەن العىس ايتامىز. ەندى تاعى ءبىر رەت ەسكە سالعىم كەلەدى. وسى قيىن كەزەڭدە سابىرلىلىق تانىتىپ، ءبىر-بىرىمىزگە قولداۋ كورسەتۋىمىز قاجەت. سونىمەن قاتار قازىرگى سۋ تاسقىنى جاعدايى تۋرالى رەسمي اقپارات كوزدەرىنە عانا سەنۋلەرىڭىزدى سۇرايمىن»، - دەدى وبلىس اكىمى.
