مادەنيەت ءمينيسترى داۋرەن اباەۆتىڭ اڭداماي سويلەپ وتىرعان تاعى ءبىر ۆيدەوسى تارادى. وندا مينيستر جەرگىلىكتى تەلەارنالارداعى باسسىزدىقتاردى توقتاتۋ تۋرالى وتىنىشپەن شىعىپ وتىرعان انالاردىڭ بىرىنە "ۇناماسا كورمەي-اق قوي!" دەگەندەي جاۋاپ قايىرادى، دەپ حابارلايدى “ادىرنا” ۇلتتىق پورتالى.
جەلى قولدانۋشىلارىنىڭ جازۋىنشا، بۇل ديالوگ تۇركىستان قالاسىنداعى كەزدەسۋدىڭ بىرىندە بولعان.
"جاعانى ۇستاتقان ۆيدەو ۇزىندىسىندە ەگدە جاسقا كەلگەن، اق جاۋلىقتى انالاردىڭ ءبىرى مادەنيەت جانە سپورت مينيسترىنە رەسپۋبليكالىق تەلەارنالاردا مەنتاليتەتىمىزگە اسەر ەتەتىن، ۇلتتىق قۇندىلىق، ءتالىم-تاربيەگە جات، ينتريگا، مەلانحوليا جانە تراگەدياعا تولى ءۇندى سەريالدارىنا توقتاۋ سالۋ قاجەتتىلىگىن اتاپ، قازاق ەلىن تولعاندىرىپ جۇرگەن ماسەلەنى كوتەرگەن. وسى ورايدا ۇلتتىق قۇندىلىقتاردى ويلاعىسى كەلمەيتىن ارنالارعا وكپەمىزدى ارتىپ جۇرگەندە، قر مادەنيەت جانە سپورت ءمينيسترىنىڭ «ۇناماسا پۋلتتى اۋىستىرىپ جىبەرىڭىز»،-دەگەن جاۋابى مادەنيەتىنەن ارى اتتاپ، ايدى اسپانعا بىراق شىعارعانداي بولدى.
حوش! مينيستر ايتقانداي پۋلتتى باسقا ارناعا اۋىستىردىق دەلىك؟! رۋحانياتقا باي ءھام ءبىلىمدى ناسيحاتتايتىن «ءبىلىم جانە مادەنيەت» ارناسىن نەگە قۇرتىپ جىبەردى؟! نەگە جاۋىپ تاستادى؟ ءبىلىم جانە مادەنيەت» ارناسىنىڭ ءومىر سۇرۋگە قۇقى بار ەدى عوي؟ الدە مادەنيەتتى «ءبىر بولايىق»، «قوسلايىق» سەكىلدى ماعىناسىز، ارزان ويىنعا ۇلاسقان شوۋ-بيزنەس دەپ تۇسىنە مە؟! نەمەسە وزگە ەلدىڭ ءونىمى قازاق ارنالارىندا كورسەتىلمەسىن، تىيىم جوق دەگەن ۇستانىممەن وزگە ەلدىڭ سەريالدارىن ناسيحاتتاۋ ما؟! ۇلتتىق قۇندىلىقتاردى ۇلىقتايتىن تەلەارناداعى – تاربيە قۇرالى قايدا؟!", - دەپ جازعان جەلى قولدانۋشىسى ءارى جۋرناليست سالتانات ەسەنقۇل.
ودان بولەك، جاراس الىپباەۆ ەسىمدى جەلى قولدانۋشىسى دا مادەنيەت ءمينيسترىنىڭ بۇل ءسوزىن ۇلكەن رەنىشپەن قابىلداعانىن جازىپتى.
"داۋرەن اباەۆ بىلتىر "ۇڭگىردەن شىققان ۇلتشىلدار" دەپ ءتىل جاناشىرلارىن شىرىلداتىپ ەدى. وتكەندە جۋرناليست ايەلگە « ۆام سۆەرحۋ يلي سنيزۋ نراۆيتسيا؟" - دەپ مۇرنىن ءشۇيىرىپ ەدى.
ەندى تۇركىستاننىڭ تورىندە تەلەارنالاردى مادەنيەتتىلىككە شاقىرايىق دەپ شىرىلداعان ۇلكەن اپامىزعا "پۋلتتى الىپ، تەلەارنانى اۋىستىرا سالمايسىز با،-دەپ ميىعىنان كۇلىپ وتىر. بۇل قالاي بولعانى؟ مادەنيەتتىلىككە جاتا ما؟", - دەپ ءوز رەنىشىن ءبىلدىردى.
ۆيدەونى Telegram ارنامىزدان كورە الاسىز.
“ادىرنا” ۇلتتىق پورتالى
