Mädeniet ministrı Däuren Abaevtyŋ aŋdamai söilep otyrǧan taǧy bır videosy tarady. Onda ministr jergılıktı telearnalardaǧy bassyzdyqtardy toqtatu turaly ötınışpen şyǧyp otyrǧan analardyŋ bırıne "Ūnamasa körmei-aq qoi!" degendei jauap qaiyrady, dep habarlaidy “Adyrna” ūlttyq portaly.
Jelı qoldanuşylarynyŋ jazuynşa, būl dialog Türkıstan qalasyndaǧy kezdesudıŋ bırınde bolǧan.
"Jaǧany ūstatqan video üzındısınde egde jasqa kelgen, aq jaulyqty analardyŋ bırı Mädeniet jäne sport ministrıne respublikalyq telearnalarda mentalitetımızge äser etetın, ūlttyq qūndylyq, tälım-tärbiege jat, intriga, melanholiia jäne tragediiaǧa toly ündı serialdaryna toqtau salu qajettılıgın atap, qazaq elın tolǧandyryp jürgen mäselenı kötergen. Osy oraida ūlttyq qūndylyqtardy oilaǧysy kelmeitın arnalarǧa ökpemızdı artyp jürgende, QR Mädeniet jäne Sport ministrınıŋ «ūnamasa pultty auystyryp jıberıŋız»,-degen jauaby mädenietınen ary attap, aidy aspanǧa bıraq şyǧarǧandai boldy.
Hoş! Ministr aitqandai pultty basqa arnaǧa auystyrdyq delık?! Ruhaniiatqa bai häm bılımdı nasihattaityn «Bılım jäne Mädeniet» arnasyn nege qūrtyp jıberdı?! Nege jauyp tastady? Bılım jäne Mädeniet» arnasynyŋ ömır süruge qūqy bar edı ǧoi? Älde mädeniettı «Bır bolaiyq», «Qoslaiyq» sekıldı maǧynasyz, arzan oiynǧa ūlasqan şou-biznes dep tüsıne me?! Nemese özge eldıŋ önımı qazaq arnalarynda körsetılmesın, tyiym joq degen ūstanymmen özge eldıŋ serialdaryn nasihattau ma?! Ūlttyq qūndylyqtardy ūlyqtaityn telearnadaǧy – tärbie qūraly qaida?!", - dep jazǧan jelı qoldanuşysy ärı jurnalist Saltanat Esenqūl.
Odan bölek, Jaras Älıpbaev esımdı jelı qoldanuşysy da Mädeniet ministrınıŋ būl sözın ülken renışpen qabyldaǧanyn jazypty.
"Däuren Abaev byltyr "üŋgırden şyqqan ūltşyldar" dep tıl janaşyrlaryn şyryldatyp edı. Ötkende jurnalist äielge « vam sverhu ili snizu nravitsia?" - dep mūrnyn şüiırıp edı.
Endı Türkıstannyŋ törınde telearnalardy mädeniettılıkke şaqyraiyq dep şyryldaǧan ülken apamyzǧa "pultty alyp, telearnany auystyra salmaisyz ba,-dep miyǧynan külıp otyr. Būl qalai bolǧany? Mädeniettılıkke jata ma?", - dep öz renışın bıldırdı.
Videony Telegram arnamyzdan köre alasyz.
“Adyrna” ūlttyq portaly
