"رەسەيدىڭ فەدەرالدىق قاۋىپسىزدىك قىزمەتى (فسب) ۋكراينانى «باسىپ العاننان» كەيىن ەلدە جالعان اكىمشىلىكتەر قۇرۋدى جوسپارلاعان. ولاردى ۋكراينادان الدەقاشان قاشىپ كەتكەن ايماق پارتيالارىنىڭ بۇرىنعى فۋنكتسيونەرلەرى، سونداي-اق تىيىم سالىنعان "وپپوزيتسيوننايا پلاتفورما زا جيزن" پارتياسىنىڭ وكىلدەرى "باسقارۋى" كەرەك ەدى". بۇل تۋرالى ۋكراينا قاۋىپسىزدىك قىزمەتىنىڭ سپيكەرى ارتەم دەحتيارەنكو "گلاۆكوم" باسىلىمىنا بەرگەن سۇحباتىندا ايتتى، دەپ جازادى "ادىرنا" ۇلتتىق پورتالى.
دەحتيارەنكو بۇرىنعى ساياساتكەرلەر رەسەي اسكەرلەرىنىڭ قولداۋىنا سۇيەنىپ، بيلىككە قايتا ورالعىسى كەلەتىنىن اتاپ ءوتتى. ونىڭ ايتۋىنشا، اقپان ايىندا رەسەيدىڭ ۋكرايناعا جاپپاي باسىپ كىرۋى قارساڭىندا ولار رەسەي مەن بەلارۋستىڭ شەكارالاس ايماقتارىنا ءوتىپ، ولاردىڭ ءبىرازى قىرىمدا بولعان.
ول سونداي-اق ۋكراينادا بيلىك قۇرۋدى ارمانداعان كرەمل قولباسشىلارىنىڭ ەسىمدەرىن اتادى. اڭگىمە بۇرىنعى قورعانىس ءمينيسترى پاۆەل لەبەدەۆ، قاۋىپسىزدىك كەڭەسىنىڭ بۇرىنعى باسشىسى الەكساندر ياكيمەنكو، بۇرىنعى ىشكى ىستەر ءمينيسترى ۆيتالي زاحارچەنكو، ۇقك حاتشىسىنىڭ بۇرىنعى ورىنباسارى ۆلاديمير سيۆكوۆيچ، پرەزيدەنت اكىمشىلىگىنىڭ بۇرىنعى باسشىسى اندرەي كليۋەۆ تۋرالى بولىپ وتىر.
«بۇل ادامدار وسى ۋاقىتقا دەيىن بەلگىلى ءبىر شەشىمدەردىڭ قابىلدانۋىنا اسەر ەتىپ، بۇرىنعى قول استىنداعى قىزمەتكەرلەرىمەن بايلانىستا بولۋ ارقىلى ەڭ قۇپيا اقپاراتقا قول جەتكىزىپ وتىردى»، - دەپ اتاپ ءوتتى ۋكراينا قاۋىپسىزدىك قىزمەتىنىڭ سپيكەرى.
دەحتيارەنكونىڭ ايتۋىنشا، سيۆكوۆيچ پەن كليۋەۆ ماسكەۋدە فسب باقىلاۋىندا جۇمىس ىستەيتىن «ساياسي كەڭسە» قۇرعانىن اتاپ ءوتتى. ولاردىڭ ۋكراينا ساياساتىنداعى بايلانىستارى ءالى دە كەڭ جانە ولار فسب-عا ۋكراينا ازاماتتارىنىڭ قايسىسىن باسقىنشىلىق قۇرىلىمىنا جۇمىسقا الىپ، پايدالانۋعا بولاتىنى تۋرالى ۇسىنىستار بەرىپ وتىر.
"ادىرنا" ۇلتتىق پورتالى
