"Reseıdiń Federaldyq qaýipsizdik qyzmeti (FSB) Ýkraınany «basyp alǵannan» keıin elde jalǵan ákimshilikter qurýdy josparlaǵan. Olardy Ýkraınadan áldeqashan qashyp ketken aımaq partııalarynyń burynǵy fýnkıonerleri, sondaı-aq tyıym salynǵan "Oppozııonnaıa platforma za jızn" partııasynyń ókilderi "basqarýy" kerek edi". Bul týraly Ýkraına qaýipsizdik qyzmetiniń spıkeri Artem Dehtıarenko "Glavkom" basylymyna bergen suhbatynda aıtty, dep jazady "Adyrna" ulttyq portaly.
Dehtıarenko burynǵy saıasatkerler Reseı áskerleriniń qoldaýyna súıenip, bılikke qaıta oralǵysy keletinin atap ótti. Onyń aıtýynsha, aqpan aıynda Reseıdiń Ýkraınaǵa jappaı basyp kirýi qarsańynda olar Reseı men Belarýstiń shekaralas aımaqtaryna ótip, olardyń birazy Qyrymda bolǵan.
Ol sondaı-aq Ýkraınada bılik qurýdy armandaǵan Kreml qolbasshylarynyń esimderin atady. Áńgime burynǵy Qorǵanys mınıstri Pavel Lebedev, Qaýipsizdik Keńesiniń burynǵy basshysy Aleksandr Iakımenko, burynǵy Ishki ister mınıstri Vıtalıı Zaharchenko, UQK hatshysynyń burynǵy orynbasary Vladımır Sıvkovıch, Prezıdent Ákimshiliginiń burynǵy basshysy Andreı Klıýev týraly bolyp otyr.
«Bul adamdar osy ýaqytqa deıin belgili bir sheshimderdiń qabyldanýyna áser etip, burynǵy qol astyndaǵy qyzmetkerlerimen baılanysta bolý arqyly eń qupııa aqparatqa qol jetkizip otyrdy», - dep atap ótti Ýkraına qaýipsizdik qyzmetiniń spıkeri.
Dehtıarenkonyń aıtýynsha, Sıvkovıch pen Klıýev Máskeýde FSB baqylaýynda jumys isteıtin «saıası keńse» qurǵanyn atap ótti. Olardyń Ýkraına saıasatyndaǵy baılanystary áli de keń jáne olar FSB-ǵa Ýkraına azamattarynyń qaısysyn basqynshylyq qurylymyna jumysqa alyp, paıdalanýǵa bolatyny týraly usynystar berip otyr.
"Adyrna" ulttyq portaly
