بۇگىن جەتىسۋ وبلىسىنىڭ اكىمى بەيبىت يساباەۆ تۇرعىندارمەن العاشقى كەزدەسۋىن ەسكەلدى اۋدانىندا وتكىزدى. قارابۇلاقتاعى مادەنيەت ۇيىندە وتكەن جيىندا وبلىس باسشىسى كوپشىلىكتى ءوڭىردىڭ الەۋمەتتىك-ەكونوميكالىق دامۋىنان قىسقاشا حاباردار ەتىپ، اۋدان باسشىلىعىنىڭ الدىنا ناقتى مىندەتتەر قويدى. كەزدەسۋدە تۇرعىندار نەگىزىنەن اۋىز سۋ مەن ارىق جۇيەسىن جۇرگىزۋ، گازداندىرۋ، الەۋمەتتىك نىسانداردى جوندەۋ مەن سالۋ، جايىلىمدىق جەر ماسەلەلەرىن كوتەردى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
بەيبىت يساباەۆ ەل پرەزيدەنتى وبلىس باسشىلىعىنىڭ الدىنا ازاماتتاردىڭ تۇرمىس جاعدايىن، ءال-اۋقاتىن ارتتىرۋعا قاتىستى پروبلەمالاردى شەشۋ مەن جەتىسۋ وبلىسىن الەۋمەتتىك-ەكونوميكالىق تۇرعىدان ودان ءارى دامىتۋ مىندەتتەرىن قويعانىن اتاپ ءوتتى. سول سياقتى ەسكەلدى اۋدانىنىڭ ەكونوميكاسىنداعى ەرەكشەلىكتەرگە، باسىمدىق بەرەتىن باعىتتارعا توقتالدى. ماسەلەن، اۋدان قانت قىزىلشاسىن ەگۋدەن ايماقتا 1-ءشى ورىندا، ياعني وبلىستاعى جالپى ەگىستىكتىڭ 29%-ىن قۇرايدى. سونىمەن قاتار اۋداننىڭ كارتوپ شارۋاشىلىعىن، ونىڭ ىشىندە چيپسى مەن فري ءوندىرىسىن دامىتۋ الەۋەتى زور.
- الايدا اۋداندا وڭدەۋشى كاسىپورىندار جوق، سىيىمدىلىعى مول زاماناۋي كوكونىس ساقتاۋ قويمالارى جانە توڭازىتقىشتارى جوقتىڭ قاسى. مال شارۋاشىلىعىندا مال باسىنىڭ سانى 50 مىڭعا جۋىق بولسا دا، نەبارى 4 بورداقىلاۋ الاڭى جانە 2 شۇجىق تسەحى بار. جىلىنا ورتا ەسەپپەن 34 مىڭ توننا ءسۇت وندىرىلەدى، 7 تاۋارلى ءسۇت فەرماسى بار، بىراق تەك 2 مەكەمە عانا ءسۇت ونىمدەرىن شىعارادى. بۇل جەتكىلىكسىز، - دەدى وبلىس باسشىسى.
سول سياقتى پايدالانىلماي جاتقان اۋىل شارۋاشىلىعى جەرلەرىن انىقتاپ، مەملەكەت مەنشىگىنە قايتارۋ جۇمىستارىنا، جاڭا ينۆەستيتسيا تارتىپ، وڭدەۋ ونەركاسىپتەرىن اشۋ، جۇمىس ورىندارىن قۇرۋ، بالىق جانە جىلىجاي شارۋاشىلىقتارىنا نازار اۋدارۋ، اۋىز سۋ، گازداندىرۋ، سۋارۋ جەلىلەرىن جۇرگىزۋ سياقتى كوپتەگەن ماسەلەلەرگە باسا كوڭىل ءبولۋدى تاپسىردى. «سىرتقى نارىققا باعدارلانا وتىرىپ، ساپالى اۋىل شارۋاشىلىعى ونىمدەرىن ءوندىرۋ ءۇشىن جاڭا تەحنولوگيالاردى بەلسەندى ەنگىزۋ كەرەك»، - دەدى ب.يساباەۆ. بۇعان دەيىن ەسكەلدى اۋدانىندا اكىمدەردىڭ نەبارى ءبىر جىل كولەمىندە عانا جۇمىس ىستەپ كەتكەنىن تىلگە تيەك ەتكەن وبلىس باسشىسى الداعى ۋاقىتتا كەلەسى تاعايىندالاتىن اكىمنىڭ ءوز قىزمەتىن نەعۇرلىم ۇزاق مەرزىم اتقارۋىنا، باستاعان جوبالارىن اياقتاۋىنا مۇمكىندىك بەرگەن ءجون ەكەنىن اتاپ ءوتتى.
وسى جيىندا جالپى سانى 15 تۇرعىن 40-قا جۋىق سۇراق قويدى. ساۋالداردىڭ باسىم كوپشىلىگى اۋىز سۋ مەن باقشا سۋاراتىن ارىق سۋىنا قاتىستى بولدى. وسى ماسەلەلەردى كوكجازىق، جاڭالىق، اقىن سارا، مەلكومبينات، بايىسوۆ اۋىلدارىنىڭ تۇرعىندارى كوتەردى. سول سياقتى ەلدى مەكەندەرگە گاز تارتۋ ماسەلەسى دە - كوپشىلىكتىڭ مازالايتىن تاقىرىپتاردىڭ ءبىرى. جالپى اۋداننىڭ ورتالىق اۋىز سۋ جۇيەسىمەن قامتىلۋ دەڭگەيى جوعارى بولعانىمەن، 40% جەلىنىڭ توزىعى جەتكەن. قازىر قارابۇلاق، اقتۇما، اقەشكى، سىرىمبەت، الدابەرگەنوۆ، تەرەكتى اۋىلدارىندا سۋمەن قامتۋ جۇيەلەرىنىڭ قۇرىلىسىن جۇرىگىزۋ مەن قايتا جاڭعىرتۋ قولعا الىنۋدا. تاعى ەكى اۋىلدا وسىنداي قۇرىلىستىڭ قۇجاتتارى ازىرلەنىپ جاتىر. سونداي-اق ازىرگە اۋدانداعى 3 ەلدى مەكەنگە عانا گاز جەتكىزىلگەن. وتكەن جىلى 4 اۋىلعا گاز تاراتۋ جەلىسىن سالۋ باستالسا، بيىل تاعى 4 اۋىل وسىنداي جوسپارعا ەنگىزىلىپ، قارجىسى قاراستىرىلعان. سولاردىڭ ىشىندە تۇرعىندارى ساۋال قويعان كوكجازىق، بايىسوۆ اۋىلدارى دا بار. سونداي-اق ايتىلعان ساۋال-وتىنىشتەر نەگىزىندە وبلىس اكىمىنىڭ ورىنباسارى الىبەك جاقانباەۆتىڭ جەتەكشىلىگىمەن ارنايى كوميسسيا بىرنەشە اۋىلداعى ارىق جۇيەسىنىڭ كەمشىلىكتەرى، ونى تۇزەتۋ جولدارىن قاراستىراتىن بولادى.
الدابەرگەنوۆ اۋىلىنىڭ تۇرعىنى ماديار اقجولتاەۆ ەرەكشە قاجەتتىلىگى بار بالا تاربيەلەپ وتىرعان اتا-انا رەتىندە بالالاردى وڭالتۋ ورتالىعىن اشۋ تۋرالى ۇسىنىس بىلدىرگەن ەدى. وتىنىشكە بايلانىستى اۋدان باسشىلىعىنىڭ ايتۋىنشا، اتالعان اۋىلدا بوس تۇرعان ەسكى مەكتەپتىڭ عيماراتىن پايدالانۋعا بولادى. بەيبىت يساباەۆ الدىمەن عيماراتتىڭ جارامدى-جارامسىزدىعى تۋرالى ءتيىستى ماماندارعا ساراپتاما جاساتىپ، انىقتاۋ كەرەكتىگىن ايتتى. «بالالاردىڭ ومىرىنە قاۋىپسىز بولسا، وندا سول عيماراتتى قالپىنا كەلتىرىپ، ورتالىق جاساۋعا بولادى. ەگەر قاۋىپ بولسا، وندا باسقا جولىن قاراستىرۋ كەرەك. بالالاردىڭ ءومىرى ءبىز ءۇشىن بارىنەن قىمبات»، - دەدى وبلىس اكىمى.
شىمىر اۋىلىنا بالاباقشا جانە ستاديون، جالعىزاعاش اۋىلىنا مادەنيەت ءۇيى، جاڭالىق، ەشكىولمەس اۋىلدارىنا مەكتەپ كەرەك دەگەن ۇسىنىستارىن جەتكىزگەن اۋدان تۇرعىندارىنا بەيبىت يساباەۆ:
- اۋداندار بولىنىسىندە الەۋمەتتىك نىسانداردىڭ سانى قانشا، حال-احۋالى قانداي، حالىق سانىنا قاراي سۇرانىس دەڭگەيى قانداي، سونىڭ بارىنە تولىق تۇگەندەۋ جۇرگىزەمىز. سول بويىنشا كەلەسى جىلى ءبىرىنشى كەزەكتە قانداي نىساندار سالىنادى، الداعى 3-5 جىلداعى مەجەمىز قانداي، بيۋدجەتتىڭ مۇمكىندىگىنە قاراي وسىنىڭ ءبارىن جوسپارلاپ، جۇمىس جاسايتىن بولامىز، - دەدى.
كەزدەسۋدەن كەيىن وبلىس اكىمى جەكە ازاماتتار ءۇشىن قابىلداۋ وتكىزدى.
