سارسەنبى كۇنى اقش پرەزيدەنتى دجو بايدەن مادريدتە وتكەن ناتو سامميتىندە رەسەي تاراپىنان جاسالعان قوقان-لوقىعا جاۋاپ رەتىندە امەريكا قۇرلىقتاعى، اۋەدەگى جانە تەڭىزدەگى اسكەري كۇشىن ەۋروپادا كوبەيتە تۇسەتىنىن جانە پولشاعا 5-ارمياسىنىڭ شتابىن تۇراقتاندىراتىنىن ايتتى، دەپ حابارلايدى "ادىرنا" ۇلتتىق پورتالى "ازاتتىق" سايتىنا سىلتەمە جاساپ.
- اقش-تىڭ جاڭا اسكەري كەمەلەرى — يسپانياعا، جويعىش ۇشاقتارىنىڭ ەسكادريلياسى — ۇلىبريتانياعا، قۇرعاقتاعى اسكەرى — رۋمىنياعا، اۋە قورعانىسى كۇشتەرى — گەرمانيا مەن يتالياعا، ال ءتۇرلى سالاداعى قارۋلى كۇشتەرى — بالتىق ەلدەرىنە ورنالاسادى، - دەدى بايدەن.
ونىڭ سوزىنشە، بۇل — رەسەي ۋكرايناعا باسىپ كىرگەن سوڭ ەۋروپاداعى قاۋىپسىزدىكتى نىعايتۋ جانە ناتو جەرىنىڭ ءاربىر قادامىن قورعاۋ ءۇشىن جاسالادى.
قازىر ەۋروپادا اقش-تىڭ 100 مىڭعا جۋىق اسكەرى بار، رەسەي ۋكرايناعا باسىپ كىرگەن سوڭ تاعى دا 20 مىڭ قوسىلعان.
اقش-تىڭ پولشاداعى اسكەري شتابى ناتو-نىڭ شىعىس قاناتىنداعى تۇراقتى كونتينگەنتىنە اينالادى. پولشا پرەزيدەنتى اندجەي دۋدا ۆاشينگتوننىڭ شەشىمى پولشا قاۋىپسىزدىگىن نىعايتۋعا قوسىلعان ۇلكەن ۇلەس جانە رەسەيگە كورسەتىلگەن ايقىن بەلگى دەپ اتادى.
رەسەي سىرتقى ىستەر ءمينيسترلىنىڭ ورىنباسارى سەرگەي ريابكوۆ "ۆاشينگتون جاعدايدى ۋشىقتىرىپ وتىر" دەپ ايىپتاپ، قارسى شارا قولعا الىناتىنىن مالىمدەدى.
سامميت كەزىندە بايدەن تۇركيا پرەزيدەنتى ەردوعانمەن دە كەزدەستى. بايدەن شۆەتسيا مەن فينليانديانىڭ ناتو-عا كىرگەنىنە قارسى بولماي، ورتاق كەلىسىمگە كەلگەنى ءۇشىن ەردوعانعا العىس ايتتى. ۆاشينگتون بۇعان دەيىن بۇل داۋعا بايلانىستى تۇركياعا ەشبىر قىسىم جاساماعانىن جانە ەشنارسە ۋادە بەرمەگەنىن مالىمدەگەن. وسى سامميتتە ۆيدەو بايلانىسپەن سويلەگەن ۋكراينا پرەزيدەنتى ۆلاديمير زەلەنسكي ناتو-دان كۇتەتىن ناقتى كومەكتەرىن اتادى.
"ادىرنا" ۇلتتىق پورتالى.
