سوت قىرعىزستاننىڭ ەكس-پرەزيدەنتى المازبەك اتامباەۆتى 2020 جىلعى قازانداعى جاپپاي تارتىپسىزدىكتى ۇيىمداستىردى دەگەن ايىپ بويىنشا اقتادى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
"بىشكەكتىڭ پەرۆومايسكي اۋداندىق سوتى المازبەك اتامباەۆتى 2020 جىلدىڭ قازانىندا بىشكەكتەگى جاپپاي تارتىپسىزدىكتەردى ۇيىمداستىرۋ ءىسى بويىنشا كىناسىز دەپ تانىپ، قىلمىس قۇرامى بولماۋىنا بايلانىستى اقتادى", - دەدى سۋديا ۇكىمدى وقىعان كەزدە.
سونداي-اق سوت ەكس-پرەزيدەنت اتامباەۆتىڭ كەڭەسشىسى فاريد نيازوۆتى، ەلدىڭ ىشكى ىستەر ءمينيسترىنىڭ بۇرىنعى ورىنباسارى قۇرسان اسانوۆتى جانە اتامباەۆتىڭ كۇزەتشىسى قانات ساعىمباەۆتى اقتادى.
اتامباەۆقا قاتىستى بۇلتارتپاۋ شاراسى ۇيقاماققا اۋىستىرىلدى، ول شەشىم زاڭدى كۇشىنە ەنگەننەن كەيىن جويىلادى. الايدا اتامباەۆ كولونيادا قالادى، ويتكەنى 2013 جىلى قىلمىس اۆتوريتەتى ازيز باتۋكاەۆتى بوستاندىققا زاڭسىز شىعارۋ ءىسى بويىنشا ۇكىم ءالى كۇشىندە.
ەسكە سالايىق، 2020 جىلى قىرعىزستاندا پارلامەنت سايلاۋى ءوتىپ، ونىڭ ناتيجەسى حالىقتىڭ نارازىلىعىن تۋدىرعان بولاتىن.
ميتينگتەر تارتىپسىزدىككە ۇلاسىپ، سالدارىنان قازاننىڭ 6-سىنا قاراعان ءتۇنى سول كەزدە ۇلتتىق قاۋىپسىزدىك مەملەكەتتىك كوميتەتىنىڭ تەرگەۋ يزولياتورىندا بولعان اتامباەۆ بوساتىلعان ەدى.
تەرگەۋ ماتەريالدارى بويىنشا ول زاڭسىز بوساپ شىققان.
“ادىرنا” ۇلتتىق پورتالى
