Sot Qyrǵyzstannyń eks-prezıdenti Almazbek Atambaevty 2020 jylǵy qazandaǵy jappaı tártipsizdikti uıymdastyrdy degen aıyp boıynsha aqtady, - dep habarlaıdy “Adyrna” ulttyq portaly Tengrinews.kz saıtyna silteme jasap.
"Bishkektiń Pervomaıskıı aýdandyq soty Almazbek Atambaevty 2020 jyldyń qazanynda Bishkektegi jappaı tártipsizdikterdi uıymdastyrý isi boıynsha kinásiz dep tanyp, qylmys quramy bolmaýyna baılanysty aqtady", - dedi sýdıa úkimdi oqyǵan kezde.
Sondaı-aq sot eks-prezıdent Atambaevtyń keńesshisi Farıd Nııazovty, eldiń ishki ister mınıstriniń burynǵy orynbasary Qursan Asanovty jáne Atambaevtyń kúzetshisi Qanat Saǵymbaevty aqtady.
Atambaevqa qatysty bultartpaý sharasy úıqamaqqa aýystyryldy, ol sheshim zańdy kúshine engennen keıin joıylady. Alaıda Atambaev kolonııada qalady, óıtkeni 2013 jyly qylmys avtorıteti Azız Batýkaevty bostandyqqa zańsyz shyǵarý isi boıynsha úkim áli kúshinde.
Eske salaıyq, 2020 jyly Qyrǵyzstanda parlament saılaýy ótip, onyń nátıjesi halyqtyń narazylyǵyn týdyrǵan bolatyn.
Mıtıngter tártipsizdikke ulasyp, saldarynan qazannyń 6-syna qaraǵan túni sol kezde Ulttyq qaýipsizdik memlekettik komıtetiniń tergeý ızolıatorynda bolǵan Atambaev bosatylǵan edi.
Tergeý materıaldary boıynsha ol zańsyz bosap shyqqan.
“Adyrna” ulttyq portaly
