ماۋسىمنىڭ ءار ءۇشىنشى جەكسەنبىسى - مەديتسينا قىزمەتكەرلەرى كۇنى. وسىعان وراي، الماتى وبلىسىنىڭ ورتالىعى قوناەۆ قالاسىندا اق حالاتتىلارعا قۇرمەت كورسەتىلدى. سالتاناتتى جيىنعا وبلىس باسشىسى مارات ەلەۋسىزۇلى قاتىسىپ، دارىگەرلەردىڭ ەڭبەكتەرىن ەرەكشە ەلەپ ءوتتى.
“كەز كەلگەن مەملەكەتتىڭ ەڭ باستى مىندەتتەرىنىڭ ءبىرى ەل ازاماتتارىنىڭ دەنساۋلىعىن ارتتىرۋ. سوڭعى ەكى جىلدا، پاندەميامەن كۇرەس كەزىندە تاجىريبەلى دارىگەرلەر بارىنشا جۇمىسىن كورسەتكەن قىزمەتكەرلەرگە زور ريزاشىلىعىمدى بىلدىرەمىن. قاڭتار وقيعاسى كەزىندە جاراقات العان ازاماتتارعا جەدەل مەديتسينالىق كومەك كورسەتكەن دارىگەرلەردىڭ ەڭبەگى ولشەۋسىز. كوپ ادامدار جۇمىس ورنىن تاستاسا دا، سىزدەرگە مۇنداي مۇمكىندىك بولمادى. سوندىقتان دا حالىقتىڭ ريزاشىلىعى سىزدەرگە ەرەكشە.
انتىنا ادالدىق تانىتىپ، كۇن سايىن ەرلىككە تەڭ ءىس اتقارىپ جۇرگەن سىزدەردىڭ ارقايسىسىلارىڭىز قۇرمەتكە لايىقسىزدار”-, دەدى مارات ەلەۋسىزۇلى ءوز سوزىندە.
جيىندا كۇنى-ءتۇنى جارعاق قۇلاعى جاستىققا تيمەي، دەرتتىڭ ەمىن تاۋىپ، كۇش-جىگەرىن سالىپ جۇرگەن مەديتسينا قىزمەتكەرلەرى “دەنساۋلىق ساقتاۋ ىسىنە قوسقان ۇلەسى ءۇشىن” توسبەلگىسىمەن، “ەڭبەك ارداگەرى” مەدالىمەن ناگرادتالدى. سونىمەن قاتار، “2022 جىلدىڭ ۇزدىك مەديتسينالىق قىزمەتكەرى” بايقاۋىنىڭ جەڭىمپازدارى “ۇزدىك دارىگەرلىك امبۋلاتوريا”، “ۇزدىك الەۋمەتتىك قىزمەتكەر” نوميناتسياسىمەن ماراپاتتالىپ، جەڭىمپازدارعا ديپلوم مەن اقشالاي سىيلىق تابىستالدى. ۇزدىكتەر اراسىندا الماتى ايماقتىق بالالار كلينيكالىق اۋرۋحاناسىنا دارىگەرى قاراساەۆ تا بار. ول بۇل بايقاۋدا “ستاتسيوناردىڭ ۇزدىك دىرىگەرى” نوميناتسياسىن جەڭىپ، 7 ميلليون تەڭگەگە يە بولدى.
“اۋىلدىق جەرلەردى وركەندەتۋ، دامىتۋ ماقساتىندا “ديپلوممەن اۋىلعا” باعدارلاماسى ۇيىمداستىرىلىپ، ءوز ناتيجەسىن بەرۋدە. مەن دە ۋنيۆەرسيتەتتى ءبىتىرىپ، وتەگەن باتىر اۋىلى، الماتى ايماقتىق بالالار كلينيكالىق اۋرۋحاناسىنا دارىگەر بولىپ ورنالاستىم. اۋىلدىق جەرلەردە بالالاردىڭ دەنساۋلىعىنا دەن قويىپ، بارلىق كۇش-جىگەرىمىزدى سالىپ كەلەمىز. اتاۋلى كۇندە ەلەڭگەن ەڭبەك تەك مەنىكى عانا ەمەس، بۇكىل ۇجىمنىڭ جەڭىسى”- دەپ اتاپ ءوتتى راميل قاراساەۆ.
ايتا كەتەرلىگى ەلىمىزدە مەديتسينا قىزمەتىنىڭ ساپاسىن جاقسارتۋعا مىقتاپ كوڭىل ءبولىنىپ جاتىر. ماقساتىندا مەديتسينا سالاسىنا بولىنگەن قاراجات كولەمى دە ۇلعايىپ كەلەدى. ماسەلەن بيىلدىڭ وزىنە بۇل سالاعا 4,4 ميلليارد تەڭگەدەن استام قاراجات بولىنگەن. جىل سايىن عيماراتتار مەن تەحنيكالىق بازا جاڭارتىلىپ كەلەدى. سونىمەن قاتار سوڭعى ءۇش جىلدا 354 دارىگەر جاڭادان جۇمىسقا تۇرعان.
