"ناۋرىزبەك جىراۋ شىعارمالارى"كىتابىنىڭ تۇساۋكەسەرى ءوتتى

3213
Adyrna.kz Telegram

وتكەن اپتادا قۇرمانعازى اتىنداعى قازاق ۇلتتىق كونسەرۆاتورياسىندا قازاقستان مەن ورتا ازياعا ايگىلى، بەسقالا جىراۋلىق ءداستۇرىنىڭ كورنەكتى وكىلى ناۋرىزبەك نۇرجاۋبايۇلىنىڭ (1931-1994) «ناۋرىزبەك جىراۋ شىعارمالارى» اتتى كىتابىنىڭ تۇساۋكەسەرى ءوتتى.

كىتاپتى جىرشى، قر مادەنيەت سالاسىنىڭ ۇزدىگى، قۇرمانعازى اتىنداعى قازاق ۇلتتىق كونسەرۆاتورياسىنىڭ اعا وقىتۋشىسى كۇنقوجا قايرۋللا قۇراستىرىپ، العىسوزىن جازىپ، باسپاعا دايىنداعان. كىتاپ «تەرمە، تولعاۋ، ولەڭدەر»، «ارناۋلار، ولەڭ حاتتار»، «ءان ماتىندەرى»، «جىر-داستاندار»، «ماقالالار»، «ەستەلىكتەر»، «جىراۋعا ارنالعان جىرلار» اتتى بولىمدەردەن تۇرادى.
كەشتە ءسوز العان جازۋشى، دراماتۋرگ، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى ءسۇلتانالى بالعاباەۆ: «مەن بۇگىنگىدەي كەزدەسۋدى كوپ كۇتىپ ەدىم. اسىعا كۇتكەن سەبەبىم، مەن قاراقالپاقستان قازاقتارىمەن بايلانىس جاساعانىما بيىل 35 جىلدان استى. مەنىڭ جازعان پەسالارىم نوكىس قالاسىنداعى تەاترلاردا كوپ كويىلدى، سوندا بەسقالا حالقىنىڭ ونەرگە، مادەنيەتكە دەگەن ىقىلاسى مەن قۇرمەتى ەرەكشە ەكەنىن كورگەن ەدىك. 1989 جىلى قاراقالپاقستان قازاقتارىنىڭ ادەبيەتكە، مادەنيەتكە جانە قازاق ونەرىنە سىڭىرگەن ەڭبەگى جونىندە «ەنشىمىز بولىنبەگەن ەل ەدىك» دەگەن ماقالا جازدىم. ول ماقالا ۇلكەن ماسەلە كوتەرىپ، تاشكەنتتە، وزبەكستاننىڭ ورتالىق پارتيا كوميتەتىندە تالقىلاندى. وسىلايشا، ەكى ەلدىڭ بايلانىسىن، بارىس-كەلىسىن نىعايتۋ كەرەك» دەگەن اڭگىمە سول كەزدە باستالىپ ەدى. «ناۋرىزبەك جىراۋ شىعارمالارى» اتتى كىتاپتىڭ جارىق كورۋىمەن قۇتتىقتايمىن. قاراقالپاقستان قازاقتارىنىڭ اقىن-جىراۋلارى، ولاردىڭ شىعارمالارى ۇشان-تەڭىز، ناسيحاتتالماي جاتىر. بۇل ءالى باسى عانا» دەدى. كەشتى قازاقستان جازۋشىلار وداعىنىڭ مۇشەسى، تولەگەن ايبەرگەنوۆ اتىنداعى سىيلىقتىڭ لاۋرەاتى، اقىن احمەت ومىرزاق جۇرگىزىپ وتىردى.

تۇساۋكەسەر مەرەكەسىنە ءسۇلتانالى بالعاباەۆ، وسەرباي سارسەنبايۇلى، ادايبەك بەيىمبەتوۆ، قۇتماعامبەت قونىسباي، شارافاددين ءامىر، بەرىك ءجۇسىپوۆ، ايگۇل قوسانوۆا سياقتى ەلىمىزگە بەلگىلى ونەر يەلەرى مەن اقىن-قالامگەرلەر جانە ناۋرىزبەك جىراۋدىڭ زايىبى زيبا وتەگەنقىزى قاتىسىپ جيناق-كىتاپتىڭ قازاقتىڭ ونەرى مەن مادەنيەتى ءۇشىن ماڭىزى زور ەڭبەك ەكەنىن اتاپ ءوتتى.

كەشتە ايگىلى جىراۋ وسەرباي سارسەنبايۇلى جانە كۇنقوجا قايرۋللا، جانگار مامبەتنازاروۆ سىندى جاس جىرشىلار ناۋرىزبەك جىراۋلىڭ تەرمە-تولعاۋلارىن ورىندادى.

نۇربانۋ كامال،

"ادىرنا" ۇلتتىق پورتالى

پىكىرلەر